黃國健自從入咗立法會後忙到震，因此老早決定退下工聯會理事長嘅火線，外界一直睇好由副理事長林淑儀接任，事關林大姐資歷極深，點知噚晚改選大熱倒灶，由70年出世嘅另一副理事長吳秋北當選。
落選因老公口多多
本來林大姐要接任，冇人反對，弊就弊在佢老公即係民建聯嘅黃定光，早排喺公開場合大大聲話佢老婆會接棒，搞到工聯會好鬼尷尬，咁講咪即係欽點而唔係選舉，據聞連林大姐都覺得唔好意思。噚晚佢選唔到理事長但做咗副會長，仲話對選舉結果冇失望。
與此同時，工會內又有唔少人認為，既然大佬落任，好應該學民建聯咁畀年輕一輩接班，反正日後選舉都要靠呢班年輕人，早啲實戰吓仲好。原副理事長吳秋北係最適合人選，事關佢係未來參選大熱之一，結果喺天時地利人和下，39歲嘅吳秋北獲選為工聯會新任理事長。
黃國健就改任副會長，佢噚日選完急急腳去機場，連大合照都唔影，但唔係搭飛機去澳洲出席個仔畢業禮，只係送老婆機。換言之，佢會留港挺鬍鬚曾。至工聯會會長呢個位，除咗棠哥冇人會上，連任唔到先係新聞。