一場金融海嘯，只有具資本實力嘅金融機構先可以留低，其中一家就係渣打集團（2888）旗下渣打銀行（香港）。噚日渣打同傳媒慶祝150周年紀念，都咪話唔難得。
渣打銀行喺1859年成立，3年後成為本港首家發鈔銀行，比獅子行仲早。另一樣深入民心嘅，莫過於60年代開始、同迪士尼合作推出嘅卡通錢箱，包括米奇老鼠、唐老鴨等，都係集體回憶一部份，就連渣打香港行政總裁洪丕正都有一個唐老鴨錢罌。直至05年，渣打先再送卡通錢箱。
渣打香港到咗7月19日就正式150歲生日，家最老資格嘅員工係後勤職員，做咗超過35年，仲要係由老竇嗰代開始做落。渣打都冇待薄員工，每做滿5年就會送禮物獎勵，做滿10年有鑲鑽金幣、Tiffany餐具或者旅遊禮券，唔怪得有員工連續兩代都留喺渣打啦！