提到冰球，給人感覺有異常的速度，人和人的重磅撞擊力，聽落好似好危險。但原來香港玩冰球的小朋友數目都不少，還會組隊參加比賽，香港更有舉行國際冰球賽事，無論教練及家長統統異口同聲話玩冰球非常安全，值得小朋友參加。
記者：林佩婷
攝影：王文忠
不撞的冰球
好多人以為冰球即等於冰上曲棍球，但「MegaIce5人冰球賽」賽事總監Keith話冰球源於冰上曲棍球，但更有速度及衝擊力。「冰上曲棍球每隊11人，但冰球得6人。前者用橙色橡皮圓球，守門員唔用門棒，但冰球用橡皮圓餅，仲有特長守門棒。冰球好睇嘅地方係有多啲碰撞，速度更快，令觀眾睇得更刺激。」聽落真的好似要埋身肉搏，不怕小朋友受傷？Keith話不用擔心：「香港本身無職業球隊，我哋教小朋友亦唔會玩碰撞，加上保護措施充足，跟大人相比，小朋友頭盔全面包實，且加多個頸箍保護。」
香港獨有5人賽
剛提及傳統冰球一隊6人，香港於1994年開始舉辦國際賽事，但卻變成5人賽！「正規比賽有守門員及中鋒各1名、翼鋒及防守後衞各2名。冰場最少要有56×26米，但香港以前嘅溜冰場都太細，所以改做5人賽，減少一個翼鋒。直至MegaIce落成符合國際標準，舊年先變番6人賽，但由於個名已成為香港特色，所以無改到。」
通常比賽，都由自己教練帶領，但Keith就試過連續兩年做替工。「記得04年聯賽，有位教練喺決賽當日突然去唔到叫我頂上，好彩拎咗冠軍。點知第二年同樣情況又出現，亦剛好拎埋冠軍，真係好難忘。」冰球要打得叻，Keith話最緊要搏命。「搏命唔係指一味同人衝同人撞，而係指預測到個波將會彈去邊然後搏命去追波、攔截，5、6歲小朋友唔太識聽戰術，通常任佢點打，到7、8歲就好好多。」
Marco：兩代齊齊學
8歲的Marco學了冰球年半，甄氏父母齊聲：「最初都會諗有無危險，但見到着晒保護衣物，香港又唔會教撞，反而覺得安全過其他運動。而且囝囝有啲白蝕，唔曬得太陽，冰球喺室內玩啱晒佢。我哋亦因為佢而開始學冰球，實行齊齊玩增加感情。」Marco更直指最愛冰球快速感覺，尤其是做前鋒入球很有滿足感。「以前有玩花式溜冰，所以好易上手，雖然試過俾支棍頂親個肚，但着晒裝備從未受過傷。」
Justin：比溜冰有快感
7歲的Justin學了冰球兩年，之前都玩開溜冰，媽媽饒太話最初只為貪地點近。「小朋友上興趣班，首選要方便。以前住太古城，最近當然係溜冰，最重要係一年四季都可以玩，唔受天氣限制。玩咗幾年後，Justin覺得悶，於是開始學冰球。佢係屋企細仔，好多時集中力差啲，但玩咗之後，明顯個人認真咗好多。」Justin亦說：「玩冰球比花式溜冰快好多，好玩好多，希望將來可以出去比賽。」
09「MegaIce5人冰球賽」
今年將會有60隊世界各地勁旅來參加，包括日本、多倫多、北京等。4月28日至5月2日為5-12歲青少年組別，5月5日至9日則為13歲以上成人組別，市民亦可免費觀看賽事。
5歲小童就適合學習冰球，現時更有3-6歲的幼兒初階班（$525起/5堂）、7-11歲的基本課程（$625/5堂）及一大人加一位3-11歲小孩的親子班（$1,000/5堂）。
地點：九龍灣宏照道38號MegaBoxL10-1
查詢：27094020