荃灣地貌老舊，直至摩天大廈如心廣場落成，改變了荃灣的天空，還帶來這區一直缺乏的豪裝食肆。金碧輝煌大龍鳳，未免太刻意；摩登粵劇佈置，中國風得來更有型。新派酒樓VCuisine，總廚曾服務福臨門及Cucina，中日意聯合國菜樣樣精通，唔知吃慣福臨門的大劉，會唔會轉場同甘比嚟荃灣，一邊用刀叉吃羊架配一壺濃普洱，一邊呷着Cappuccino啖蝦餃？
Fusion版福臨門
Fusion菜，最怕好睇唔好食。VCuisine就沒此問題，皆因總廚廖師傅曾任職富豪飯堂福臨門，中菜根底紮實，點心、菜式都以粵菜為本，卻選用其他地方更佳的食材，打開點心紙，名字又長又睇唔明的，唔使驚，即管放膽點吧！像牛肉腸粉選用安格斯牛，燒賣用黑魚子取代蟹子，食味更佳，fusion點心不是胡亂的confusion。師傅曾與香港酒店Cucina合作，意菜都好拿手，燒羊架、牛膝是必食，食物擺設花心思，很有日本菜影子。傳統點心也做得精，如蝦餃皇用游水鮮蝦做，皮薄餡靚，用小蒸籠盛着，賣相別致。當然，師傅最拿手的傳統粵菜，像福臨門最出名的火朣翅和脆皮雞，這裏也食得到。
千萬豪裝粵劇主題
優雅環境是另一賣點，斥資過千萬的裝修，摩登得來有氣派，佈置以粵劇為主題，四周掛滿手工粵劇服飾，大廳闊落不似酒家又逼又嘈，亦有靈活的獨立房間，私隱度高。又設有酒吧區，不飲茶也可坐低嘆紅酒、飲咖啡、看雜誌。唯一缺點是沒有中文名，約阿媽去飲茶，有點麻煩。
黑魚子花菇蒸燒賣$14/2件
用黑魚子取代蟹子，更矜貴更鮮味。
鵝肝醬一口漢堡仔$38
法國鵝肝配黑椒汁，一啖一個，油香十足。
大師香草燒和羊架$138
澳洲和羊以黃芥辣醃過，吃時蘸點薄荷膏，羊味不重但肉質軟腍，一份可切成四件。
大吟釀清酒法國鵝肝$108
鵝肝配蘆笋、漬蘿蔔、蘋果條，淋上清酒汁，賣相滿分，味道也好。
日本酥皮燒鰻魚$32
吃過入口溶化的酥餅嗎？鰻魚惹味鬆軟，食完心掛掛。
金翅魚湯餃$38
浸湯以南瓜茸做湯，灌湯餃內滿是冬瓜茸，吃過留下滿嘴鮮甜。
和風鮮蝦手指卷$26
薄脆春卷皮包着彈牙蝦粒，wasabi沙律醬好香，最難忘蝦味鮮鮮鮮。
VCuisine（24080099）
荃灣楊屋道8號如心廣場3字樓301號店
脆口拔絲一啖難忘
喺荃灣想坐得舒適食得特色，還有北京人家。酒家主打京川菜式，當中的拔絲更是出色，客人可選擇拔絲香蕉或蘋果等都得，筆者選了香蕉，貪其外脆內軟，蕉味配糖漿夠香甜，記得要將拔絲浸冰水，皆因外面糖漿冷卻後變脆，有咬口更有層次，糖漿亦不會太黐牙。另一必食還有狗不理，包身鬆軟，餡料調味得好，不會太鹹，大葱味香濃，豬肉打得幼滑，捧着熱騰騰的狗不理放入口，太幸福啦！
拔絲香蕉$52/8粒
拔絲難做之處，在於如何調校糖漿的濃稠度，酒家師傅做得剛好，拉到絲之餘又不太黏。
鍋貼$24/4件
吃時小心爆汁！鍋貼外皮不厚，肉汁又豐富，一咬下即時流出！
狗不理$22/2件
餡料的大葱味溢出，豬肉肉汁豐富，是另一推介。
葱油大餅$24
葱油餅脆得來不太油膩，落葱時間很準，沒有煮燶，亦冇因太生而帶有草青味。
北京人家（29410066）
荃灣楊屋道1號荃新天地高層地下43及81號鋪