綠茵場乃英雄地，上月旺角場一句令人聽罷熱血沸騰的叫罵聲：「要幾多球呀，換我出去！」弦外之音明眼人心裏有數，只好替英雄嘆一句：「人在做，天在看！」英雄好漢買少見少，幸好尚有光榮引退的山度士和雷達華，依然願意為香港足球盡點綿力，縱然他們認為香港足球有假波。
記者：蒙為亮
攝影：林栢鈞
山度士
外號「神童」，13歲在南華青年軍上陣，兩度當選香港足球先生，1995年在皇朝盃被選為亞洲足球明星隊一員，1998年轉投晨曦，在01至02年球季為球會奪得首個冠軍，2002年掛靴，現開設足球學校。
雷達華
外號「光頭仔」，八十年代精工中場大將，與隊友陳發枝、胡國雄同為八十年代為香港代表隊主將，退下火線後專心教波，曾執教香港隊、香港青年軍、愉園等，現為山度士足球學校的主教練。
買起隻腳 故意踢膝頭
帶領晨曦摘下聯賽盃冠軍後，山度士決定辭退教練職務，20年足球生涯有起有跌，大球會、大港腳、奧運賽全部踢過，更贏了「世紀球星」美譽，獎項以外，踢足球最大的得着就只有難能可貴的友情，當中包括一出道就專職箝制他十年多的一代球星雷達華。
山度士=山
雷達華=雷
記者=記
雷：無講錯呀，當年南華對麗新花花，我專負責Mark你，你打進攻中場，我打防守中場。記得有次南華界外球，你細細聲同隊友講會回傳番個波畀佢，我信以為真即刻撲過去，點知你一轉身就快放，蠱惑到飛起。
山：哈哈，我唔係蠱惑，係用腦踢波，我入得最「世界」嗰球都係對你隊麗新花花喎，我一扭四再入大細龍門，扭過一個外籍球員、張志德、黃國安，自己睇番錄影帶都覺得正。
雷：你有天份嘅，當年我踢精工過跑馬地練波，見到你踢聖若瑟學界比賽，一睇就知你呢個鬼仔非池中物，點知你13歲踢南華預備組，無耐踢埋正選，成為最年輕華籍入球球員。
山：唔好話當年嘞，個紀錄一早俾盧均宜破咗啦，江山代有才人出，回望過去唔會有進步。
記：山度士，點解當年你傷十字韌帶，咁辛苦都要回歸球壇？
山：我真心鍾意足球，一世都唔會變。休息嗰兩年我好多謝隊友、屋企人同當時南華班主許晉奎，初初喺聖保祿醫院做手術，我阿爸阿媽喺醫院等足九粒鐘，可惜好唔番，最後班主花$200,000送我過荷蘭醫腳，嗰間醫院好有經驗，戴維斯都同我同一間醫院，一醫就醫咗兩個月，好彩最後都康復，行得走得，家仲可以教吓波，都不知幾開心。
雷：無記錯應該係1993年，當年親眼睇住星島球員杜卡踢你嗰腳，我呆晒！以為你一定退出球圈，因為傷勢實在太嚴重。嗰年你得24歲，最當打，如果真係收山，好浪費。
山：佢特登我嘅，我傳地波，佢無理由踢我膝頭，佢根本無意踢波，全心踢腳，不過算啦，都過咗咁耐唔想再提。慶幸一復出就有得踢皇朝盃，仲做埋世紀球星，乜信心都返晒嚟。我信後天努力可以追番天份，我身材唔高又唔大隻，所以只可以靠勤力，當然，隊友協助都好重要。
記：有致電慰問譚兆偉嗎？
山：有，不過佢無聽我電話，講真個個都想佢好。唉，好賭爛玩，個個後生仔都會，不過應該適可而止囉，好似我食咗十幾年煙，點戒？明知對身體唔好咪食少啲囉，我都有賭波㗎，不過小賭怡情，上網投注馬會買十蚊雞，八串一過關，反而賭得仲過癮。
雷：希望偉仔早日康復啦，做兄弟都唔想佢係咁，大家麻甩佬，明啦，唔使下下講出口。
打假波為勢所迫
本以為今年球壇可一洗頹風，開季入場人數不俗，地區球隊崛起，傳統大會旗鼓相當，省港盃令球迷拍手叫好，可惜屯門普高鬧出打假波疑雲，令球壇蒙羞。
山：張天德踢香港五人隊嗰陣，我教過佢，我只能講佢好真性情。睇表面證據，真係好似有踢假波，不過我唔係當事人，唔敢妄下判斷。踢咗咁耐波，打假波呢家嘢都係聽番嚟居多。
雷：我就覺得真有其事，而且一啲都唔出奇。現役球員得幾千蚊底薪，操盤手吩咐佢入番兩球，入波即畀$4,000，你話佢會點做嘞？江湖傳聞，有教練喺重慶大廈出$4,000請球員，當然信不信由你，外籍球員經常有黑工，有啲悲凉到為照顧同鄉開飯，一人價錢兩人試腳，衰到$4,000兩個人分，咁嘅球員點會有表現？打假波根本唔出奇。
山：我哋當年一定唔會打假波，嗰個年代做足球員，人工好過做文員一倍，我哋不屑打假波，況且你無技術根本做唔到正選，點有機會打假波？我以前都係由$2,500打到$50,000月薪，家啲外籍球員？畀$50,000月薪都未必交到貨。近幾年引入巴西球員同國援，唔係話佢哋技術唔夠，只不過成隊波得一兩個巴西球員，可以同本地球員合作到咩？不如做多啲青訓啦，我認為本地球員最緊要提升技術，先有機會打出頭上一片天。
雷：無計，家外援一定秤先，外援踢得好代表老闆有眼光識買人嘛。家好少球會搞青訓，以前踢預備組，真係預備，逐級升Level，家啲青年軍全部踢甲組，根本無機會成長，日本J-Jeague咁興盛，就係因為青訓好，我敢講，日本球員嘅基本功最全面，因為人哋由細到大都有高水平訓練，頭頂腳踢智勇兼備，值得香港球員學習。
山：日本外援踢法比較接近香港球員，日本球員同巴西球員，我自己都有教過，巴西球員會組織愛上腳，搓成十幾腳先攻門，香港球員心急快傳快射，班主又鍾意睇快上快落，所以風格唔統一，根本無所適從。以前外援名額三個夠晒數，家一隊有成六、七個，人多反而手腳亂。
快樂足球VS老闆足球
談掛靴，山度士自言月薪由$50,000減至$20,000，再減至$15,000，是其離開球場主因，他說：「家做球員人工低，為興趣無計？睇你點睇啦。」不過球員應該踢不用愁的快樂足球，還是踢為老闆帶來快樂的足球，卻是個值得討論的課題。
山：做球員都係打份工，都係要取悅老闆，不過唔應該乜都由老闆做主導囉。家球壇老闆話晒事，前一排港澳埠際賽，有乜理由幾乎全部用晒南華球員？昔日賀歲盃都有港聯對其他外隊啦，家只有球會對外隊，絕對唔健康。
雷：從來球員都無Say，就算幾好波都無條件講價，大賽出乜球員由球會老闆欽點，教練揀蟀機會少，昔日嘅選拔賽名存實亡。
記：有乜救市方案？
山：梗係錢啦，我今年帶晨曦攞聯賽盃冠軍，居然一蚊都無，以前點會咁，起碼有十萬八萬獎金分畀成隊球員，基貝雲尼問我獎金問題，真係問到我口啞啞。仲有呀，所有人都知香港最受歡迎運動係足球，政府淨係識得搞馬術，真係黐X線。
雷：最近同位老前輩吹水，佢話香港足球百病叢生，想救都唔知點入手，一語中的。
山：都係搞香港足球訓練學校實際啲，不過我想講，我山度士教波唔係為賺大錢，賺大錢唔會教波啦，每個學生每個月4堂收$600，Book場加教練費加波衫錢，我幾乎要蝕。教波的確開心，希望政府可以投放多啲資源搞青訓，起碼提供場地先啦。
雷：家搞青訓都難呀，以前大家踢波無咁多計算，家啲小朋友怕曬會缺席，唉。
山：係啦，想當年我一手將對白飯魚掟落街，之後話畀阿媽聽跌咗件衫要落街執番，轉個頭已經去咗觀塘康寧道球場跟隊。
雷：哈哈，係啦，哈哈……
a.山度士：「20號球衣，係我幸運號碼。」
b.山度士告別賽，旺角全場爆滿，賽後他感觸得灑下男兒淚，正式告別綠茵場。
c.雖個子不高，但憑一頭金髮鬼仔Look，加上高超技術，倒也迷倒不少女Fans。
d.山度士16歲到法國踢費爾盃，被選為最佳球員，旁為郭家明（右）和前港隊教練黎新祥（左）。
後記
整個訪問，二人談得面紅耳熱，氣結又痛心，看來要改善千瘡百孔的本地足球絕非一時三刻的事，就如足球青訓，開花結果也要等十年時間，除消極地放長雙眼看，我們就只能等。臨別，我提起一個為人津津樂道的廣告，立刻令苦口苦面的山度士笑逐顏開，「你講嗰個桑拿廣告，哈哈，嗰次係拍膊頭，一蚊都無收，我自己都好鍾意，有人話呢啲地方唔正經，我覺得無所謂，自己OK理得人點睇。」依然故我，不似某些球員出爾反爾，山度士我撐你，這才是球星風範嘛，況且在桑拿頂波入Locker，不是人人做得到！
註：山度士足球學校，課程收費每四堂$600，查詢23685232，網址： http://www.hksantos.com
