電管局兩年前決定取消流動電訊商單方面向固網商支付互連費，而且拋出兩年過渡期，等業界用「商業模式」坐低講掂數。光音似箭，下禮拜日（26日）就到期，數碼通（315）總裁黎大鈞噚日特登開記招提醒傳媒，仲話呢兩年數記有同各大固網商傾過，之但係到家吓都未有成果。
咁會唔會搞到小市民聽唔到電話㗎？黎大鈞話就算大家仲未傾掂數，電話接駁理應唔會受影響，相信冇任何營運商夠膽做「唔適當嘅嘢」。電盈（008）近排官司纏身，睇怕都唔想另點火頭。
以前互連費係由流動商埋單，黎大鈞認為呢啲歷史包袱已經不合時宜，數記舊年畀咗近1億港銀，所以提出「打出網絡付款」模式，即係邊個打就邊個畀，照計數記仲會有錢收番㖭﹗不過，人哋會唔會理你又係另一回事，華華睇怕大家拖得就拖，尤其以前收開錢啲固網大戶。