敏妮公司有位「慳妹」，同事間有邊個要碌卡買嘢，或者想知入油用乜嘢信用卡、去邊個油站最抵，一定問佢。慳妹唔揸車亦唔係購物狂，但佢數好精、記性好，鍾意上網吓邊度有優惠，即使佢自己唔啱用，都會記低，益吓身邊嘅朋友。
最近慳妹迷上網絡遊戲─FarmTown。遊戲係上網登記之後，你就會獲分一塊田，同小量嘅網上貨幣，以有限嘅網幣去買種子。拎去種，有收成就可以拎去賣，累積網幣。
慳妹玩嘅時候繼續發揮精打細算專長，好似佢唔會自己收成，而係搵人同佢收，自己就去同人哋收，點解？慳妹話，由其他人收割啲農作物，可以賣高兩成，幫手收割又可以有錢賺，winwinsituation。
敏妮見佢玩得咁投入，於是問：「乜有錢搵㗎咩？」慳妹好興奮咁話：「有㗎，如果你想有多啲網幣，可以碌卡買。」敏妮問慳妹，佢咁講係咪代表，可以出售所持嘅網幣呢？慳妹答唔到。
調劑身心其他選擇
講到尾，慳妹未有真係喺網上賺到真金白銀，浪費咁多時間喺網絡遊戲上面，敏妮始終覺得有啲嘥，雖然話工作壓力大，上網玩吓遊戲可以調劑身心，但俾敏妮揀，寧願睇多兩本書仲有價值。
溫敏妮
http://wanmanli.com/blogs/