陳克勤先由小小嘅區議員搖身一變成為特首辦內專責影印嘅特別助理，後來仲喺立法會選舉中證明自己「trymybest」，喺新東拍住師傅劉江華連奪兩席。今時唔同往日，家變成立法會尊貴議員，連舊波士鬍鬚曾都要對呢位前下屬畀番幾分薄面，噚日專程去到大埔富善邨，為克勤仔首個地區辦事處做主禮嘉賓，令克勤仔都受寵若驚。
搵武術團舊波士
但呢兩位前上司同下屬見面時並冇回首特首辦往事，反而專注喺即場獻技嘅武術人士身上。原來克勤仔得知舊波士食過夜粥，非常識做咁搵咗班少年武術團員嚟贈興，得鬍鬚曾好鬼開心，不枉千里迢迢走到大埔咁遠。
除咗鬍鬚曾之外，睇住克勤仔大嘅劉江華當然有亮相，而喺今屆退位讓賢畀克勤仔接棒參選嘅李國英亦有捧場，事關呢個辦事處係克勤仔同李國英聯合辦事處，話晒都係半個主人家，點可以唔見人？據聞克勤仔嘅爹哋媽咪都有現身，親身祝賀阿仔，可惜克勤仔嘅怕羞女朋友堅持唔露面，唔肯到場做特別嘉賓，只願默默做佢背後嘅女人。