有人嘅地方就有代表人物，一言一行代表全部人。車仔領隊軒迪克率領球隊2:1擊敗阿仙奴，破近年個人入唔到重要決賽嘅宿命，賽後大讚球員出類拔萃，呢啲咪叫大哥風範囉，唔係鼻大就係大哥㗎！講時講，軒帥最威，當然係令杜奧巴大變身啦。
軒帥有幾威唔使多講，佢自從1988年帶領燕豪芬贏歐冠盃（歐聯前身）後，曾4次喺4強止步，認真邪！好彩上周六英足盃4強，雖然阿仙奴18分鐘由禾確特先開紀錄，不過車仔發揮後勁，33同84分鐘分別由馬隆達同杜奧巴建功，62年來首次喺英足盃擊敗阿仙奴入決賽。
杜奧巴如獲新生
軒迪克賽後話：「全隊都咁出色，我第一日就同佢哋講『畀心機』，佢哋嘅態度無可挑剔！」呢位荷蘭領隊執教13場以來，最出色係入9球嘅杜奧巴，「佢每個禮拜都有波入，今仗亦不斷威脅對方。」今仗追平1:1嘅馬隆達，亦喺軒迪克魔法下發光發熱。
英足盃決賽5月30日開波，到時亦會係軒迪克最後一場執教球隊，呢班球星點都會賣力。軒迪克講：「希望5月31日可以大開香檳，（如果贏埋歐聯同聯賽呢？）咁就要成支吹啦！」
壽星仔法比安斯基孭鑊
落敗嘅阿仙奴就冇咁好氣，領隊雲格批評溫布萊球場得個殼：「真係好笑！畀錢起個靚球場，但就冇一片好草地。」此外，前鋒尹佩斯鼠蹊受傷，周二聯賽對利物浦未必可以上陣，難怪雲格講句嘢都有火噴出嚟啦！不過，最慘仲係成場波騰騰震嘅門將法比安斯基，上周六咁啱係24歲生日，又遇上艾蒙尼亞受傷以為可以上位，點知喺雲格面前失晒分，雲格講：「最失望係失兩球低水平嘅波！」睇嚟法比安斯基，仲有今場追追吓杜奧巴唔追，成輸波罪人嘅施維斯達，都要搵定後路喇！