保護主義喺金融海嘯後抬頭，唔少矛頭仲衝住中國，不過，中國主權基金中投董事長樓繼偉出席博鰲論壇2009年年會時，語驚四座話要多謝貿易保護主義。
樓董言論嚇華華一跳，大家聽真啲就知佢揶揄班鬼佬。樓繼偉話，當日佢去歐盟搵投資機會，又或者歐盟嘅官員搵佢講投資，都要求中投明確提出投資唔超過10%，或者唔要投票權。「我說『NO』，不能接受。歐洲不歡迎我，我就不去，所以，我非常感謝貿易保護主義，使我去年在歐洲沒有投（資）一分錢。」
樓董講完自己有「吉士」之餘，仲讚中投先知先覺，佢話早喺危機發生之前，中投已經減少了對外投資。但今年情況發生咗啲新變化，特別係歐洲主要國家都歡迎中投去投資。今時今日嘅中國，形勢比人強，加上平資產唔少，樓董都好識做，話中投會積極考慮，謹慎投資喎。