隔牆有耳:余大狀教精唐唐 - 李八方

隔牆有耳:余大狀教精唐唐 - 李八方

好多人都戥唐唐唔抵,堂堂政務司司長要紆尊降貴走去保樹,真係有失身份。但有危就有機,公民黨黨魁余若薇都勸唐唐往好嘅方面諗,話有煲呔做全城清潔大隊長珠玉在前,證明小小苦楚等於激勵,只要唔嫌棄將啲芝麻綠豆嘅事都做到最好,第日肯定有位你上。
作為環保大使,余大狀都唔介意塞錢入唐唐衫袋,教佢四招護樹大法。首先要立條樹木法,訂明邊啲樹木需要悉心呵護,其次就要精簡政府管樹嘅部門,等大家唔使左推右推。與此同時就要培訓樹木專家,兼夾改善家陣保育樹木嘅官僚態度。如果唐唐可以做好呢份工,余大狀睇好呢位未來特首大熱,競逐下份工時都有優勢。