徐子淇御用化妝師GaryChung昨日在德福商場，與諸葛梓岐示範新妝，問到子淇安胎久未露面，他說：「子淇都差唔多生得，佢個肚已經好大，個樣今次冇乜變，陀得好靚，其實佢生完第一胎已經開始注重健康，以前佢好鍾意食快餐，家食嘢健康咗，食多咗好多菜。」Gary笑言由於子淇肚子十分大，甚少出街，要教她上網shopping，他說：「佢好貪靚，唔怕危險，仲着高跟鞋。」
諸葛梓岐做蚊靶
此外，諸葛梓岐透露剛與男友薛嘉麟到了泰國蘇梅島度假，她笑言當地沒有政治不穩的局面，反而受到蚊的恐怖襲擊，她說：「隻腳同背脊咬咗成百幾啖，可能啲蚊鍾意我對腳，加上去嗰幾日係潑水節，俾人當街潑水，怕咗唔敢出街。」
採訪、攝影：JessicaNgan