啲花旗國銀行喺上個禮拜陸續交第一季功課。成績唔錯，連全世界都睇死會繼續蝕錢嘅花旗銀行，都話有錢贏。
雖然由高盛開始，個個都話冇靠AIG贏錢，即係冇靠政府（原本想話「冇靠納稅人」，不過記得聯儲局已印鈔票買國債畀政府使，所以要話「冇靠政府」），孫柏文只可話：「你班友唔好玩啦！」
靚業績 靠請槍
好似一個小朋友，近排功課成績好咗。你睇落唔知幾開心，仲要同人講話佢之前成績唔好嘅日子已過去。點知個小朋友成績好咗嘅原因，係因為功課唔係自己做，每日畀老師嘅其實係靠老竇、阿媽請槍。
再講，啲花旗國銀行第二、三季會好難捱。上個禮拜，聯儲局宣佈會買啲用商廈，例如商場、寫字樓租金做抵押嘅債券。人人都話係托市，其實又係救啲銀行，因為啲商廈家好大鑊，銀行如果要硬食啲商廈債券嘅減值，又會資不抵債、即時執笠。所以又要超級垃圾缸聯儲局嚟接。
呢個美股反彈浪，越彈成交越低。上個禮拜啲垃圾股例如花旗銀行，都因淡倉被挾而上，反彈浪最後一擊。美股上到呢啲位，short得。
孫柏文
http://phatdat.blogspot.com