港交所（388）星期四舉行年度董事選舉，3個人爭兩張凳，但賽果怕且係悶局，皆因屢敗屢戰嘅華資經紀朱國柱又參選，華華e貓佢約訪問未見回覆；其餘兩位候選人即東亞銀行（023）顧問陳子政（TC）同兆亞投資董事總經理莊偉林（JohnWilliamson），相信贏硬。
點解參選？TC強調唔係自己爭取，而係3月初獲董事會邀請。喺銀行界逾30年，TC話自己證券經驗間接，都問番個說客可以點幫交易所。不過經游說後，佢好快應承，因港交所對整個金融業相當重要。佢同東亞主席李國寶報告後，寶哥哥話「有乜需要即管開聲」，令佢相當感激。
TC強調自己唔係政府委任，董事由選舉產生，所以冇包袱。現任港交所董事莊偉林參選就冇驚喜，佢舊年5月由董事會委任、接替辭職嘅股壇長毛DavidWebb，今年好自然爭取留任。
陳：董事會邀參選
董事禁售期搞到滿城風雨，外界關注政府應否加強干預港交所施政，但陳莊二人都話sofar睇唔到政府出手。TC話董事禁售諮詢某程度唔夠，但人人都會犯呢個錯，冇乜大不了，因為改革冇可能冇問題，最重要同受影響嘅人講解推行理念喎。佢又相信政府身為股東，派人入局無可厚非，最終都係為香港好。John就話，政府入股已反映當局關注香港作為國際金融中心嘅地位。
對於上市委員會應否加入更多董事，兩位候選人都冇正面回應。TC認為，上市委員會除吸引各地公司來港上市，更重要做好把關，兩者有時難免衝突。
上市委員會要把好關
佢話：「董事會應否更緊密監控上市委？真係答唔到你，因涉及各方面平衡……呢個問題亦可伸延到上市委應唔應該獨立於港交所？把關職責應唔應該撥歸證監？其實可以傾。」John就話，目前已有機制每年換委員，佢覺得上市委同董事會家吓關係良好。
mailto:[email protected]
兩名大熱港交所候選董事「政綱」
爭議事項：港府有否干預港交所管治
陳子政回應：sofar睇唔到，但相信政府某程度希望港交所採取某些發展方向
莊偉林回應：過去冇，唔覺未來會，政府入股反映其對加強香港國際金融中心地位嘅關注
爭議事項：港交所可否進一步發展商品市場
陳子政回應：看不到中央不准，港方可與內地尤其大珠三角商討商品實物交收安排
莊偉林回應：黃金期貨已推出，相信董事會也會支持其他債市產品發展
爭議事項：季度業績報告應否推行
陳子政回應：技術上冇問題，但不建議倉促推出，因季報或成為管理層短視誘因
莊偉林回應：季報可加強披露公司資訊，認同英式管治報告是有效安排