呢幾日天陰陰雨紛紛，唔少人都唔多happy，估唔到幾時會落大雨。睇怕鬍鬚曾呢幾日心情都同個天一樣咁灰，事關佢都估唔到究竟星期三立法會就預算案投票，會唔會夠票通過？既然自由黨同向來神經刀嘅詹培忠同謝偉俊妾身未明，鬍鬚曾惟有向工聯會黃國健同民建聯黃容根埋手，迫令雙黃坐定定投票，前者要曾唔要仔、後者要曾唔要健康，鬍鬚曾呢鋪債都有排還。
預算案未過保險線
喺預算案投票前幾個星期已經事先張揚，話22號投唔到票嘅黃國健KK，原意無非係叫鬍鬚曾放佢一馬，用多啲時間向其他人拉票得㗎喇，唔好阻住佢飛去澳洲出席囝囝嘅大學畢業禮。
點知鬍鬚曾唔生性，份預算案到呢一刻都只係掹車邊得30幾張支持票，未過安全保險線，所以佢連一心想做廿四孝老竇嘅KK都唔放過，近日向佢展開好聽啲叫做游說、唔好聽就叫做施壓嘅行動，力勸呢位工聯會大哥畀畀面，投票當日唔好較腳。
原本去意已決嘅KK噚日直認，有政府中人向佢展開大規模游說，至於最終會唔會留低，除咗要睇吓政府有冇誠意，以及爭取嘅嘢有冇回音，仲要睇埋大佬棠哥放唔放人，真係聞者都戥佢心酸，擔心佢忠孝兩難全，會唔會因此鬧家變？
揸fit人棠哥堅稱唔關佢事，但強調KK今晚仲有個工聯會改選會要開，似乎暗示原訂今晚11點上機嘅KK留港投票最實際。雖然工聯會至今仲未肯講投票立場，但斷估唔會留喺度投票但投反對票咁黑色幽默啩？
原訂本周二入院做膝頭蓋手術嘅民建聯漁農界代表黃容根，亦喺日前「忽然」收到邀請去南昌開漁農業會議，一班業界代表亦「忽然」覺得呢個會非由根哥代表出席不可，所以根哥強調今次唔去唔得。而最直接嘅影響，就係佢周二先返到香港，換言之要改期至下星期先做手術，又即係佢後日可以跟民建聯大隊投票支持，令鬍鬚曾又多番一票安全票。曾經笑稱唔係好想投票嘅根哥冇回應係咪受咗委屈，只叫大家唔好陰陰嘴笑佢喎。
其實至今仲有一個人係鬍鬚曾死盯對象，就係早前跌親盆骨而要做手術嘅李鳳英。可惜八方噚日搵佢唔到，唔知佢投票日會唔會現身；但若果鬍鬚曾誠意十足搵埋專車去接英姐，相信呢一票都無走雞。
mailto:[email protected]