呢期Game界大熱話，當然係《FF7AC完全版》出Blu-ray！套戲半舊不新，但谷上高清靚畫，FF迷一定「中伏」必買；另一個焗人畀錢理由，係跟特別版送期待已久嘅《FF13》PS3體驗版嚟吸客，不過唔少Gamer買後勁呻笨，彈佢畫面唔掂又唔多識連招，所以唔使幾日已經由「大牛價」急跌至四嚿幾！
文：陳福榮
超難玩遇敵系統
自去年E3，SQEX決定推出《FF13》PS3版，就知開發呢隻大嘢使咗唔少錢，以PS3現時全球銷量，齋出單一主機真係同輸硬冇分別。好彩日本仲係PS3獨佔，隻DemoGame開場先嚟《廿二世紀》Feel開場CG，撇開原創性不談，始終SQEX最耍家係CG，在正式開打前真係正到無從挑剔，女主角Lightning又索又好身材，真係有幾分「女版FF7」感覺。
戰鬥方面，佢保留可視式Encounter遇敵系統，理論上可借雷達提示迴避敵人，但實試感覺係敵人嘅接觸面太廣泛，想零遇敵難如登天。實時指令依然健在，玩家要留意每個指令有不同Turn數消耗度，例如想出三級大火就要用上三格，同等次數亦可使出「炒上天＞攻擊＞魔法」，甚至俾你逐項指令輸入，點玩法完全視乎閣下需要。
擺明車馬Sell肉感
今次係PS3第一次出《FF》！Demo可用角色係揸槍靚女Lightning，同拳頭大過沙煲嘅Snow。今次製作人員擺明車馬Sell性感，一眾女角更毫不吝嗇賣弄身材，唔講都未必知係《FF》系列。
畫面達PS3水準，播片仲好足Frame、畫質亦靚，而一般行動及戰鬥點都保持大約每秒30格，只係角色面相和主要場景均用上太多資源，令大背景明顯睇到係一張圖畫。
較失望係實時運算嘅過場部份，在物件數量較多嘅畫面，角色郁動居然有遲緩情況，似足《LostOdyssey》開波打大佬嗰陣，一時順、一時窒到無倫！高清世代解像度固然要夠高，雖則《FF13》行盡1080p，但睇起嚟唔夠順暢，希望呢個問題只係Demo版尚未完成之故啦！
Game舖：再冧機會大
除打《FF13》Demo，附錄碟仲包括PS3獨佔嘅《FFVersus13》及《FFAgito13》片段；《V13》以黑衫黑褲靚仔掛帥，加埋與女角的恩怨情仇，似睇緊《羅密歐與茱麗葉》悲情橋段。單論條片無論畫面以至氣氛都勝過《FF13》，難怪好多人家當正佢先係正宗第十三集。
至於完全版《FF7AC》電影，雖標榜全高清畫面，但其實又唔係好到非買不可，尤其當拍埋荷李活CG真係輸晒，我用部FullHD大電視睇，同用DVDUpscan差別不大。相熟Game舖套料，《FF7AC》藍光限定版出咗一、兩日即宣佈炒唔起，由起初$500蚊直插$420，有傳四百大關好快失守，相信普通版應該唔會點貴，收藏家可等靚價先入。
機種：PS3
廠商：SquareEnix
類型：RPG
人數：1人
價格：約$420（包括完全版電影Blu-ray）