鞋業股達芙妮（210）上周公佈業績後股價持續有買盤追捧，上周五再升16%兼獲大行出報告唱好。資深股友應該對210呢個冧吧頗有印象，正是以往的基金愛股永恩國際，在06至07年間由4元炒上接近10元，永恩的基金捧場客也越來越多。
不過踏入07年中之後，永恩都算多災多難，先有4月公佈業績後被基金洗倉，股價兩日急跌37%，再於8月傳出創辦人不利消息，股價單日一度急插近50%，股價於3個多月時間，高低位相差多達7成。
候回吐買貨
兩次洗倉之後，永恩已經元氣大傷，整個08年股價只能牛皮上落。未知是否永恩呢個名太「唔老利」，公司舊年8月改名做達芙妮，點知10月爆出金融海嘯之後，股價又再急插水，跌至2元水平。
今次公佈業績後，股價大反彈，一眾股東當然希望真係轉運，若無貨在手，暫時保持觀望，等回吐至買貨。
方星俠