台中巿巿長胡志強呢幾日旋風式訪港，仲約埋小妹推介當地有名嘅阿薩母紅茶、太陽餅、土產鳳梨酥等，大玩台式hightea；又話嚟台中嘅港客按年增加逾10%。
4至5月交配期鬥發光
席間小妹碰到台中元帥旅行社嘅老友Simon，佢話公司為咗方便港客，新推專車服務載旅客由台中機場到酒店，車程半個鐘，每人相當於港幣50蚊，唔使好似以前咁要花成一個鐘搭公車。港人可以喺東瀛遊等旅行社預先買飛，詳情可瀏覽www.marshaltour.com.tw。
Simon話，家唔少旅客以台中為根據地，穿梭周邊嘅清境、南投等，甚至跨區去近排勁hit嘅嘉義阿里山瑞里睇螢火蟲大爆發。小妹啱啱去咗瑞里實地感受，家仲好似發緊夢咁。
阿里山最多螢火蟲嘅地方喺瑞里嘅民宿「快樂生態生活村」，本身係生態解說員嘅民宿負責人許哲清話，4至5月係螢火蟲嘅交配期，數以萬計嘅螢火蟲拚命發光吸引異性，同天上嘅繁星爭輝（圖）。小妹當日住喺依山林而築嘅小木屋，夜晚企喺露台就見到螢火蟲漫天閃動，其實仲可以行入叢林小路同螢火蟲共舞，好鬼死浪漫。家民宿做緊導遊優惠套餐，二人房連早餐、導遊，平日價錢只係1,800台幣（約430港元）。有興趣上網 http://happy-go.emmm.tw/。
電郵：mailto:[email protected]