港大學生會會長陳一諤上星期遭網上民間電台《得罪人多，稱呼人少》主持人「快咇」譚志德愚弄，快咇假扮美國電台華人之聲《時事縱橫》主持人訪問陳一諤，令佢咪後吐真言，暴露真面目，成為全港恥笑對象。
唔回覆美國之音
正牌「美國之音」（VOA）網頁噚日報道港大學生公投支持平反六四消息，提及陳一諤質疑六四是否有屠城言論，並表示曾接觸陳一諤希望佢受訪，但等咗兩日都冇回應。一朝被蛇咬，十年怕草繩，俾快咇玩謝之後，八方有理由相信陳一諤患上「電台訪問恐懼症」，為免再次出醜，難怪佢唔敢隨便再接受訪問。
陳一諤力排眾議，唔少人逆向思考懷疑佢曲線為六四20周年做宣傳，假如陳一諤真係咁勇敢不惜捨身成仁，八方希望佢堅持到底，繼續為屠夫辯護，千萬不要半途而廢。
想當年老董激發50萬人上街，被指可能係真正「民主之父」，如果陳一諤能夠令大學生更了解六四真相，八方相信佢亦有機會史上留名，做一個大歷史中嘅小丑角。