疑似特首候選人梁振英果然係香港政壇頭號惹火人物，最新火頭喺城大辣着。由佢做主席嘅城大校董會早前通過教職員按表現加薪方案，城大教職員協會隨後公佈一個問卷調查結果，反映教職員對加薪方案意見。
唔知係咪有人認為調查結果唔啱睇，校董會向全校上下發信，質疑協會調查冇代表性，因為城大有4,000幾個教職員，卻只有寥寥200多人交問卷，未必反映全校意見。教職員協會則反駁，回應數目少，唔代表管理層可以視而不見。有城大中人話，以前梁乃鵬、鍾瑞明做校董會主席時，對教職員都十分客氣，就算霸氣十足嘅胡應湘，亦同佢哋有商有量。佢笑言新官上場三把火冇所謂，唔好收唔到科就得嘞。