天業節水（840）貼近1年低位上上落落，睇中線業務增長，天業有晒Point，值得長、短打。天業主打祖國節水灌溉系統，08年度（12月底止）就因為原料價暴漲，拖累到純利倒退咗9成。但買股買長線，要咁睇，呢期原料價降，對天業短期業績已經有幫助。
啱啱喺呢個月頭，國務院通過新增1000億斤糧食生產規劃，到2020年，祖國糧食生產能力要比家陣增加1000億斤，上到1.1萬億斤以上，意味住農耕有多無少。而3月尾《人民政協網》亦都報道話，喺祖國缺水情況下，家陣利用滴灌嘅節水灌溉技術，使用率仍然偏低。阿爺仍然支持農業發展，加埋節水系統發展空間龐大，天業中線嘅業務，應該好有計。先嚟轉短打，博天業見1字頭，現價（0.73元）潛在回報率37%，P/B仲喺1倍樓下，相對同類上兩三倍P/B嘅A股，天業仍然超抵買。
金威潛在回報近3成
金威啤酒（124）又係另一家受原材料暴漲，拖累到08年度（12月底止）業績見紅嘅企業，但金威現價跌到得番0.77元，同03年沙士低殘價差無幾，最新P/B得0.44倍。場內另一家啤酒股青啤（168），最新P/B上到3.5倍，金威殘到不堪。同樣，隨住呢期原料價格下滑，亦應該對金威09年度業績，起到正面幫助。同樣博金威上番1字頭，現價潛在回報率挨近30%，金威P/B亦未有耐到1倍水位。
錢雋