上訴庭上月中裁定教育局提出教院風波聆訊判決嘅司法覆核得直，原被裁定干預教院學術自由嘅羅范，幾乎想燒炮仗慶祝。不過過去一個月，多名學者都話羅范會錯意，因為法庭只係裁定官員搵學者呢個動作冇問題，並冇判斷佢有冇向教院施壓，羅范一廂情願以為大平反，十分阿Q。
噚日一個討論學術自由嘅論壇上，當年被羅范指名要炒嘅教院前講師葉建源，搞gag諷刺羅范，佢指呢次事件，好似有個人打劫時推跌垃圾桶，政府司法覆核要求法庭判決推跌垃圾桶算唔算毀壞公物，法庭判唔算，但劫匪依然係有打劫，並冇脫罪，即係法庭冇排除羅范以官職干預學術自由呢件事。
出席論壇嘅余若薇亦認為法庭冇為羅范平反，教院前校長莫禮時則指07年嘅獨立調查委員會報告已指明羅范有干預學術自由，不容抵賴。