「慶幸我們仍然懂得不安，慶幸我們仍然年輕，慶幸我們仍然活着。」一群生於1980年後的青年，對六四真相的扭曲模糊感到不安，為學運前輩的敢愛敢恨深受觸動。他們以六四為主題，以藝術為媒介，向全港「80後」年輕人發出呼喚，走向歷史，走出歷史。 記者：蔡元貴
他們都是廿來歲的文藝青年，在「六四唔關我事」的朋友堆中長大，卻出於生命中某一年某一點的際遇，開始關心六四。「P-at-Riot80後六四文化祭」成立於今年4月初，P-at-Riot意即在暴亂中撒野，結合起來，又是愛國者（Patriot）的意思，既忠厚，又反叛。
「文化祭作為一個媒介，目的係牽動80後出生嘅香港人，將六四事件滾動落去，用自己最舒服嘅方法做啲嘢。」籌委會成員蔡芷筠解釋「P-at-Riot80後六四文化祭」的來龍去脈。另一位搞手區華欣補充說：「支聯會嘅活動好似已經成為唯一悼念六四嘅途徑，我哋唔想只係每年一度作個人表態，希望可以透過多啲模式，讓更多年輕人參與。」
「阿爺冇畀答案我哋」
文化祭的活動包括音樂會、讀書會、街頭行為藝術等等，任職藝術機構行政人員的李俊峰說：「六四件事好清楚，對我個人嚟講，文化祭嘅焦點係六四精神。當年嘅學運領袖係廿幾歲嘅青年，佢哋見到制度有問題就行出嚟；我哋家都係廿幾歲，我哋都關注社會，例如天星同皇后碼頭嘅清拆；我哋想將六四事件話畀多啲人知，唔想事件淡化，更加想將當年學運領袖嘅精神發揚光大。」
其中一項活動是六四文物及圖片展，籌委會現正公開籌集一切有關八九民運時期的物件，不一定要與六四有關，只須顯示出當年的氣氛。例如89年6月4日寫的日記：「因為阿爺冇畀答案我哋，惟有靠各人努力尋找番當年嘅片段。」李俊峰說。
設計試卷考考會考生
學校教材沒有六四資料，有的也只是片言隻語含糊帶過。籌委會計劃設計一份六四試卷，在今年5月4日會考中國歷史科開考當天，在試場外向完成考試的學生派發，考考他們對六四的知識，喚發六四的精神。
甚麼是「六四精神」？本身是藝術教育工作者的蔡芷筠寫了一篇〈八十後宣言〉，她說：「20年過去，我們也長大了。在我們眼中，『六四』不只是一件等待平反的歷史事件，它更是一種可以承傳給下一代的態度……我們保持年青，讓生命持續燥動。我們擁抱歷史，把已故的美好價值承接到未來。我們保持敏感，發掘美好社會隱藏的虛偽。我們保持發聲，坦率宣說一切不公義。」
「P-at-Riot80後六四文化祭」網址為 http://p-at-riot.blogspot.com/
愛國者的六四精神
8965《文匯報》作嫁妝
──生於1984的區華欣
89年我只得5歲，父母帶我去遊行。家腦海中仲有個印象，騎住爸爸膊頭去遊行。小學六年級，有次上英文堂，老師叫我佈置班房，我要求將班房變成監獄，然後我同隔籬位個同學一齊大叫：「釋放魏京生！」因為當時新聞成日播。
老公條件：陪我悼念六四
中學開始，我每年都會跟父母參加六四燭光集會。每次唱歌嘅時候，父母一定會喊，我見到都想喊，但又唔清楚點解。只係知道，父母咁耿耿於懷，一定係有好嚴重嘅事發生。後來自己睇番書，睇尊子、馬龍嘅六四漫畫，覺得好奇怪，點解漫畫咁血腥？長大再睇多啲資料，包括紀錄片《天安門》，逐漸確切清楚成件事。
前年六四前夕，我媽咪突然喺保險箱攞咗份舊報紙畀我睇，係89年6月5日嘅《文匯報》（圖）。佢話呢份係我將來嘅嫁妝，要我好好保存。好似講笑，又好沉重。我攞起份剪報，一字一句咁睇，好觸動，好似噚日發生咁。睇完份剪報之後，我寫咗篇日記，希望剪報可以再傳畀下一代。我仲同自己講，第二時搵老公，都要搵個可以陪我每年參加六四悼念活動嘅人。
事實一直被抹黑 好恐怖
──生於1983的湯映彤
我父母平時唔會同我講六四嘅嘢，歷年六四燭光集會，我媽咪自己一個人去，爸爸就留喺屋企，點一支洋燭悼念，我唔知佢哋做乜。入到大學，加入學生報工作。《中大學生報》歷年都有出六四特刊，老鬼會同我哋講番六四嘅歷史，嗰時開始，接觸好多六四嘅資料。
歷史好似斷開咗咁
最觸動我嘅，係利志達嘅六四漫畫，裏面描繪北京學生，佢哋都會好似我哋家咁，得閒去跳舞、踩單車，但係佢哋又會為咗國家絕食。當時我諗，點解啲北京學生會做啲咁嘅事？我自己又做緊乜？我相信透過藝術或者任何形式探討六四，可以令人思考番一啲問題。
畢業後，我仍然會每年出席六四燭光集會，未必好投入，但係我每年呢個時候都會話畀自己聽，要記住呢件事。一件真實嘅事，一路被人抹黑、遺忘，我覺得好恐怖。籌辦文化祭，可以話係出於使命感，想多啲80後嘅香港人知道六四，因為佢哋好多人都唔知道，歷史好似斷開咗咁。所以覺得自己有個責任，作為一個人、一個曾經受惠於社會嘅人，有責任保存呢段歷史。