是咁的。酷愛集郵的魔術手前晚漏夜出擊，相約啦fing到老蘭孔雀開屏，專向疑似o靚模埋手，chok樣、變臉不拘。動L，原來蘇芬妮最近娃娃毒上腦，思覺開始失調，以上一切都是幻覺，問你囧未？其實隨着互聯網普及，近年由娛圈衍生出來的潮語，已逐漸成為生活語言，識多兩個冇壞。 撰文：蘇芬妮
【o靚模】
leng囗mou囗
（ChildishModel）
【出處】近年Model年輕化，龍女、動漫女相繼彈出，雖然言行舉止稚嫩，但深受電車男追捧，在娛圈很吃香。
【原義】N/A
【新義】泛指金髮、化日本娃娃妝、戴大眼仔、但滲透MK味的年輕模特兒，JaniceMan、Angelababy為人辦。
【例】嘩，做乜個妝化到咁行呀？你當自己係o靚模呀？
【孔雀開屏】
hung囗zoek囗hoi1ping囗
（PeacockOpenScreen）
【出處】與周慧敏相戀近20年的倪震，在夜場偷啜張茆斷正，寫悔過書以孔雀開屏為背女偷食解畫，明踩暗讚自己。
【原義】雄性孔雀張開羽毛成扇狀來吸引異性
【新義】中年男士對女友不忠，爛蒲爛滾勾三搭四。
【例】你孔雀開屏唔掂噃，陣間皇咗大嫂仲唔詐你型？
【啦fing】
laa囗"fing"
（Laughing）
【出處】謝天華在無綫劇集《學警狙擊》中飾演卧底警員Laughing哥深入民心，「Laughing」成為了社會現象，全城Laughing。
【原義】開懷地笑
【新義】謝天華在《學警》的角色
【例】唔使愁喎，啦fing都復活啦，希望在明天吖嘛！
【Chok樣】
"chok"joeng囗
（ChokeFace）
【出處】o靚模、偶像拍照時做出誇張動作，嘟嘴、睩大眼、耍帥，令人煩厭。
【原義】N/A
【新義】原字「choke」，是使窒息的意思，泛指藝人強裝得意博人好感，其中以江若琳、欣宜和古巨基為表表者。
【例】喂，你影親相都成個chok樣咁，好作狀囉唔該。
【娃娃毒】
waa囗waa囗duk囗
（DollPoison）
【出處】黃宏舜參加電視節目獻唱《娃娃愛天下》，因舞姿太騎呢而紅透網絡界，從此娃娃毒經Facebook、YouTube及討論區蔓延。
【原義】N/A
【新義】睡前看一看，心癮起又看一看，此乃娃娃毒毒發的徵狀。
【例】喂，你又睇娃娃男？小心中娃娃毒喎！
【魔術手】
mo囗seot囗sau囗
（MagicHands）
【出處】苑瓊丹在電台節目揞名踢爆娛圈有魔術鹹豬手藉表演魔術非禮女星，觸發全城通緝淫棍。
【原義】魔術表演者的尊稱
【新義】非禮之徒的統稱
【例】咪睇佢白白淨淨冇重病，其實佢係聞風喪膽嘅魔術手嚟㗎！
【動L】
dung囗"L"
（MovingL）
【出處】成龍在霸王洗髮水廣告中，煞有介事地手舞足蹈的哼出疑似形聲詞「動L」，效果爆笑。
【近義】孖寶兄弟跳躍時產生的聲音
【新義一】成龍模仿髮絲彈起的聲響
【例一】你睇吓我啲頭髮幾有彈力，動L，直頭唔使梳㖭！
【新義二】特技聲響，有感嘆意味
【例二】動L，睇嚟今日想早收工都係冇行嘞。
【集郵】
zaap囗jau囗
（StampCollecting）
【出處】吳君如在《星星同學會》中，忽爆出「集郵女星」以當紅男星上床為嗜好，全城競猜誰是該女星。
【原義】收集郵票
【新義】收集性伴侶
【例一】集郵女星集唔到華仔，條氣好唔順。
【例二】Ａ君好濫交，郵票簿成本電話簿咁厚。
【囧】
gwing囗
（N/A）
【出處】先在台灣討論區流行，其後胡杏兒將之發揚光大，因其誇張表情十足「囧」樣，似足「囧」石，被尊稱為胡囧囧。
【原義】窗戶明亮、通明
【新義一】表情符號，雙眉緊皺作O嘴狀
【例】輸咗波啫，唔使成副囧樣呀嘛？
【新義二】無可奈何、失意、挫敗
【例】唔好囧啦，最多還番晒啲閃卡畀你嘞。
【變臉】
bin囗lim囗
（ChangeFace）
【出處】娛圈盛吹整容風，但藝人歌手紛紛否認整容，惟有以變臉來理性地分析他們相貌突變的原因。
【原義】突然生氣、黑面
【新義】疑似整容
【例】我識個整容醫生，話變臉唔會留疤痕㗎。
編按：以上英語繙譯純粹搞笑
話你知：流行語言潮來潮去
經典潮語：阿燦
出處：劇集《網中人》廖偉雄的角色
意義：內地新移民，帶歧視成份
經典潮語：小強
出處：電影《唐伯虎點秋香》中出現
意義：蟑螂
經典潮語：木嘴輝
出處：劇集《親情》周潤發的角色
意義：呆子，通常罵人時用
經典潮語：疑似
出處：淫照事件後廣泛運用
意義：懷疑相似，其實擺明是
經典潮語：閃卡
出處：淫照事件後廣泛運用
意義：淫照
經典潮語：朋友
出處：淫照事件後廣泛運用
意義：收集淫照的網民
經典潮語：奇拿
出處：淫照事件後廣泛運用
意義：首位發放淫照的神秘人
經典潮語：賣飛佛
出處：吳卓羲唸myfavorite的港式發音
意義：我的喜好
經典潮語：斷背
出處：電影《斷背山》
意義：同性戀
經典潮語：何B仔
出處：漫畫《蠟筆小新》
意義：陽具
經典潮語：車震
出處：梁榮忠與朱慧敏車廂親熱
意義：車廂激戰
經典潮語：飛釘
出處：鄭秀文真空拍廣告
意義：凸點
經典潮語：電車男
出處：日本電影《電車男》
意義：宅男
資料來源：《蘋果》資料室
專家話：潮語一雞死一雞鳴
30年前劇集《網中人》爆出新移民代名詞「阿燦」，時至今日被嘲對象由內地人變香港人，「阿燦」變「港燦」，當中的微妙轉變足見昔日潮語經得起時間考驗。反觀時下網民自創、傳媒大力追捧的「潮語」卻方生方死，次文化堂社長彭志銘表示：「以前電視係主要傳播媒介，而且啲劇集好多都係長篇劇，影響力自然較大較廣，而且以前嘅潮語都係有文化基礎，例如『阿燦』，嗰陣好多內地人嚟香港，套劇正好同當時社會氣氛融合。又例如『爆燈』就係嚟自以前《聲寶之夜》顯示勝負嗰排燈。」
自從互聯網普及後，潮語的流行持久力又起了變化，彭志銘說：「反而家係互聯網天下，出得多出得快，好多時都係講直接反應，但流傳落嚟而且發展落去嘅唔多。而且好多年輕人希望引人注意，發明一啲大家都唔係好明嘅潮語，經過傳媒大力催谷之後，過一段時間又死，再流行另一個。」
