44歲的張家輝與45歲的甄子丹，均是今晚「第28屆香港電影金像獎」中的影帝大熱門。決戰在即，兩人各出法寶放鬆緊張心情，張家輝昨日選擇到中環嘆至愛的牛腩河，甄子丹則與愛妻形影不離，拍住拖到跑馬地齊齊揼骨。
香港影壇盛事「第28屆香港電影金像獎」今晚在尖沙嘴文化中心舉行，今年競爭最激烈及最矚目的獎項，莫過於影帝寶座，雖然5位候選影帝梁朝偉、任達華、甄子丹、張家輝及古天樂均斤両十足，但卻以《証人》中飾演職業殺手洪荊的張家輝，及《葉問》中飾演一代宗師的甄子丹呼聲最高。
子丹夫婦十指緊扣
大戰之前難免緊張，張家輝和甄子丹這兩天各自搵節目紓緩心情。前晚甄子丹便與太太汪詩詩到跑馬地奕蔭街的中醫館揼骨鬆弛，二人逗留至凌晨12時許才離開。不施脂粉的汪詩詩步出中醫館時發現記者拍照，即頭耷耷挽住甄子丹的臂彎，然後二人十指緊扣往雲地利道取車，齊返薄扶林碧瑤灣寓所。記者昨日致電甄子丹，問到他心情是否緊張時，他說：「平常心面對，志在參與，有冇獎都咁開心。」
至於另一影帝大熱張家輝，則於昨午約2時偕助手及司機到中環歌賦街著名的九記牛腩午膳，一行三人點了四碗牛腩粉麪，其中家輝獨自擦了兩碗牛腩河，胃口甚佳。逗留約25分鐘後，家輝便與助手等埋單離開。據悉家輝嘆完牛腩河後，往中環IFC連卡佛選購衣服，湊巧其勁敵甄子丹也於差不多時間到IFC做gym，但二人未有機會碰面。
家輝演活柔情殺手
家輝在《証人》中，與飾演其大肚妻子的苗圃因遇上車禍人生逆轉，苗圃慘變植物人，家輝飾演的洪荊則盲了一隻眼，為籌錢救妻，走上當殺手的不歸路，角色表面深沉，冷血不仁，但內心深處依然懷着一份柔情，家輝因演活這個殺手角色大獲好評，更因而首度獲提名金像獎影帝。被視為大熱的他，日前接受訪問時卻淡然地說：「咁多年嚟，我對每個演出機會都畀心機，都係嗰句啦，有份入圍已經當有獎，真係有就係獎勵。」
入行20年，影視作品逾80齣，家輝代表作有四，《証人》當然是其一，他說：「一定係代表作啦，大家畀咁多鼓勵，有認同，做演員都想係咁啫，仲想點呀？呢套戲喺我歷史上算滿意，其他滿意嘅仲有《放．逐》，《黑社會》嘅飛機啦，仲有《化骨龍與千年蟲》，個角色係幾可愛㗎。」洪荊一眼瞳孔灰白，造型突出，原來背後有蹺妙，家輝笑說：「拍攝時我係戴咗隻淺色嘅隱形眼鏡，你哋見到隻眼係灰色，係後期花錢做特技，我出場嘅每一個shot都要用特技執隻眼嘅顏色㗎。」
畢生追求完美劇本
有特技backup，但演技始終是重心，家輝說他最愛洪荊對妻子的情誼，他說：「有場戲講我睇住老婆食藥，我話：『唔使驚，老公喺度。』嗰一刻我自己喺戲院都睇到喊。後來我同林超賢去柏林影展再睇番呢套戲，隔咗咁耐再睇都好感動。睇到大家對呢個角色嘅反應，我唔係點騰雲駕霧，其實過往呢類動作片我都有拍過，今次自己流暢好多，從旁聆聽、思想統一，喺互相信任嘅情況下，演出冇乜困難。」
家輝續說：「我覺得導演手法同劇本好好，每一個演員一生追求嘅就係好劇本、好導演。電影係群體創作，唔係一個人可以改變成件事，唔係大家有共通點或者信心不足，我唔相信會有好成績出現。佢哋最初構思呢個故事，我一直從旁聆聽，到呢個戲開啦，我花上幾組戲去投入角色，因為我一路有聽指示，一早已經做好心理準備。」
採訪、攝影：娛樂突發組、李全
特稿：出色証人vs轉型葉問
今屆金像獎戰況激烈，影帝頂頭大熱張家輝與甄子丹由頭鬥到尾，票數叮噹馬頭。前者在《証人》中演繹出色，早前已先奪香港電影評論學會最佳男演員獎，但甄子丹憑《葉問》成功轉型，不再全以動作掛帥，演技大躍進，加上有去年李連杰憑《投名狀》打低《神探》劉青雲和郭富城等封帝，破除動作演員冇獎攞一說，令甄子丹攞獎機會大增。反觀曾5登帝座的梁朝偉，曾公開自認《赤壁》演出欠佳，早已打定輸數。
至於最佳女主角方面，屬《天水圍的日與夜》的鮑起靜和《性工作者2我不賣身．我賣子宮》的劉美君之爭，二人票數相近，雖然劉美君憑《性》片膺台灣金馬影后，來勢洶洶，但鮑姐資深又有導演夫婿方平支持，夫婦在業內人脈極廣，在拉票上勝一籌。周迅在《畫皮》飾演狐妖贏口碑，成為黑馬。
《天》片導演許鞍華奪最佳導演及最佳電影皆呼聲甚高，以《保持通話》競逐導演獎的陳木勝則其頭號勁敵。
此外，廖啟智在《証人》中飾演有情有義的跛腳老差骨，最佳男配角近乎是他的囊中物，可以一爭的對手，則為《葉問》的兩位綠葉林家棟及樊少皇。最佳女配角大熱是《天水圍的日與夜》的陳麗雲和《一個好爸爸》的苗可秀，最佳新演員的大熱是《長江7號》的徐嬌及《天》片的梁進龍。
撰文：李全
小八卦：高清透析《天水圍》
以大熱姿態問鼎金像獎多項大獎的《天水圍的日與夜》（圖），是許鞍華從影30年來第21部作品，也是她首次棄用傳統而昂貴的菲林，改以高清（以電視播放制式為本的製作）拍攝的電影，製作時間僅個多月，成本約百多萬，去年7月中起只在百老匯電影中心放映，票房不足100萬，但許鞍華以簡單故事，描寫天水圍這個悲情城市中的一點溫情，寫實手法愈見爐火純青，成大熱之選。
中台之爭火花四溢
本屆最佳亞洲電影之爭亦是兩岸之爭，內地名導馮小剛（圖）憑《非誠勿擾》及《集結號》，火併魏德聖執導的台片《海角七號》。《非》片及《海》片分別是內地和台灣史上最賣座華語片，但後者卻較得港人青睞，上月馮小剛曾大罵港人唔識貨，「就知道對着大陸片說×（廣東話粗口）」。今次兩大導演再次狹路相逢，令賽果更添看頭。
話你知：400人票選金像獎得主
今晚金像獎共頒發19個獎項，得獎者由電影業界成員組成的評審團投票選出，投票過程分為兩輪，首輪先由100人組成的評審團選出候選名單，成員均為業內人，第二輪投票評審團成員增至400人，包括首輪有份投票的50名成員，另加上12個屬會如演藝人協會及導演會等成員。投票於本月10日截止，交由專業會計師核點票數，賽果由保安公司保管，至頒獎禮當晚才送抵會場，保密工夫做足，就連金像獎籌委主席也不知賽果，確保公正。
