09年紅館裝修後第一Show，無番咁上下江湖地位的歌手，邊能夠搶到這個開門紅。大家當然知道，結果是左麟右李，如果當時買唔到飛，睇唔到佢哋大晒肌肉唔緊要，因為一套3碟過的DVD已經有售，娛樂性十足。
記者：陸俊雄
攝影：陳盛臣（部份Products）
碟1 晒肌肉
好唔鍾意有啲演唱會光碟，硬係搞一大輪人來人往前前後後，結果都未入正題。09左麟右李呢方面非常好，兩位主角好快就已經出場。不過以5首小串燒作開場的設計，略嫌唔夠火，少了點熱切期待。要等到緊接住的演唱會主題曲《唔使驚》起樂時，才引來了一點興奮。說實話，碟1頭大半段都偏靜，縱然來個收利是添笑料，也未覺有嘉年華的氣氛。但正當你有所失望時，點知克勤開始首先晒肌肉，光暗輪廓都表現得不錯。雖然這部份歌舞不太夾，但睇得出下過不少心機KeepFit，叫歌迷沒有失望。
碟2 開Party
看左麟右李，無非想有好歌聽之餘，想感受派對般的氣氛，我敢講碟2才是精采部份所在。先來是一班環球兄弟晒冷，萬人大合唱世界Key，仲會見到關楚耀好無聊咁帶埋部相機上台唱歌；老實講！最近新聞見親佢個樣都好憂鬱，真係差啲唔記得佢都有咁活潑開朗一面；到SportsMedley一段，兩位仲超好氣好力跳住唱，兼玩絲帶舞，感覺真係幾新鮮。
至於真正想欣賞好歌靚聲，就不能錯過緊接的《大會堂演奏廳》和《幻影》，以哀怨得來但相當清脆的鋼琴聲做主伴奏，男聲到高音位時異常開揚，果然用上94K/24Bit的錄音及混音，質素毫不失禮。跟前面一味熱鬧的臨場感，完全是另一種感受。
碟3 減肥特訓
今次在碟3最後的Makingof一定要睇，因為有左麟右李操肌肉和扮大隻佬影相的過程，非常好笑。而且更大爆佢哋預備演唱會的期間，每日只食雞肉、白飯和青菜，基本上汁都無滴。兩位台上收身大隻咗咁多，認真得來不易。
2009左麟右李演唱會（3碟裝）$175
