旺角貴為全球人口密度最高地方之一，嗰種人車爭路逼狹法，莫講揸車新手，就算有經驗司機，都話免得過都唔塞入旺角。馬路如是，安頓座駕更係求「位」若渴。今日就同你精選6大車場，要豪要舒服抑或慳錢至上乜都有，優點缺點即時話你知！
記者：徐影龍
攝影：陳盛臣
鳴謝：VolkswagonHK
停車場
低難度
大場無壓力
落旺角食飯Shopping，預咗使錢，豪多幾十蚊，泊番闊落又多位嘅大型商場，比起等半粒鐘錶位，又或靈蛇入洞般超高難度泊細場，舒服放心。
新世紀廣場
劃一收費
亞皆老街同太子道都有入口，最體貼係每層都有「吉位」數量提示，同一層更有分區車位數量顯示一眼望清。最鍾意佢全天候劃一收費，幾時泊入去都係$22一粒鐘，毋須密密睇錶驚踏入繁忙時段。車位充足，只稍嫌出入閘口稍窄。
地址：旺角火車站
時租：$22/小時（八達通）
優惠：購物滿$200免費兩小時，最多可Free泊四小時。（商場1/F客戶服務處辦理）
朗豪坊
有代泊
旺角另一豪華靚場，車位數量同闊落度跟新世紀有得揮，不過就貴少少，超趕時間又捨得嘅，更可畀朗豪酒店代客泊車，$45一粒鐘，勝在乾手淨腳擺低就走。要彈係入口處就有點轉折，需由砵蘭街兜入山東街，唔知碇可能會搵餐懵。
地址：旺角砵蘭街
時租：周一至四$24/小時、周五至日$30/小時（八達通/VISA）
優惠：購物滿$200免費兩小時，最多可Free泊四小時。（商場1/F客戶服務處辦理）
中難度
心臟地帶夠就腳
呢兩個場唔係最平，但出入口、上落同車位都偏窄，算係有點難度，點解仲要揀佢？因為比新世紀同朗豪坊更接近旺角心臟地帶。
柏裕商業中心
無電子付款
10年前新牌仔唔知碇，泊過一次後唔敢再去，近年出入口翻新過，闊落同光猛咗好多，上落泊車已經無乜難度。$28一粒鐘算貴，但最低消費15分鐘，過鐘攞車最多蝕$7。留意不設電子付款，攞車前記住到入口旁繳費，否則走時要倒車就相當頭痕。
地址：旺角登打士街56號
時租：$7/15分鐘（地下繳費處現金付款）
廣發商業中心
轉到頭暈
個人首選，貪佢沿途駛入廣華街，算係旺角最唔塞車路段，附近就係好景同模型街。場內光猛車位闊落，每層只得幾個位，好多時要轉到上頂先有位，易頭暈。
地址：旺角廣華街
時租：周一至五$11/半小時、周六日$12/半小時（出閘口現金付款）
高難度
日泊最抵玩
高手專用，場地唔大車位唔多，但以日泊嚟計就平盡旺角，如果打算落旺角Wet超過4粒鐘，已經翻本。
金雞廣場
入等到
除到盡，日泊只係$7.3一粒鐘，可惜又係泊過一次就怕。拗彎入車已令人等到，落到去車道狹窄，仲係兩層式升降車架，慢油上斜入架已一身汗，車架超窄最好摺起側鏡先隊入去。
地址：旺角洗衣街39-55號
時租：周一至五$23/小時、周六日$25/小時（出口現金付款）
日泊：周一至五7:00am-7:00pm $88
聯運街露天場
隨時刮底
出名多人泊嘅爛地，位處火車橋下邊，由亞皆老街轉入聯運街就到。場內車位劃到最盡，車多時就算L位都要扭多兩手軚，欄邊有樹根、大石、凸出鐵絲網等雜物，小心刮底同揩尾。
地址：亞皆老街轉入聯運街
時租：$20（出口現金付費）
日泊：8:00am-6:00pm $70
錶位
等泊鬥耐性
雖然錶位$8一粒鐘夠晒平，可惜旺角錶位數量少需求大，等人走嘅車數目多到經常變成DoublePark，等一個鐘都可能無位，加上九成以上都係半小時或1小時錶位，就算畀你泊到，都要實手錶驚過鐘。
瀟灑走旺角
同福士借架最新嘅PassatCC做泊車專題，起初有啲擔心，始終車身比一般日本車大一點點。實地試過又唔係想像中咁有難度，全部停車場出入都算輕鬆自如，睇位視線亦好足夠，唔會俾低矮路障雜物陰到，更有自泊S位系統，遇着街邊錶位唔會雞手鴨腳。最重要係車櫳闊落、座椅軟熟，喺旺角塞咗半日車都唔太辛苦。令人驚喜係2.0L車都幾好火，燈位急腳起圍Cut過隔籬線都無問題。
查詢：VolkswagenHK（36989688）
