90變包靚框

講到Creative，數碼相機的確可讓用家盡情發揮天份，不過有時影相影得多都要換吓口味，搞吓新意思，又有另一種玩味。拎住PENTAX新推出嘅Prosumer級數碼相機X70，功能夠強，既有得玩24倍變焦，廣角能力亦不俗，拍照取景都係利器能力，但講到吸引好玩，就要數到內置有90款相框，各種新奇趣怪公仔，玩過就知影相原來仲可以咁好玩！

記者：許福合　
攝影：王文忠　
Model：Cherry@PureModels

細細部Prosumer

將X70給予幾個朋友試玩，佢哋第一個反應就係「咁細部嘅？」雖然X70嘅規格，叫做Prosumer級相機當之無愧，尤其有支可用到24倍光學變焦嘅鏡頭，更係凸顯X70機身之迷你，話佢係掌上嘅ProsumerDC亦不為過！
功能方面，由自動到手動等專業級拍攝模式當然不會缺少，不過我最睇好同覺得好玩嘅係內置有90種相框，於同級ProsumerDC中亦較少有提供，而款式種類亦非常多，由平凡淨色到各類公仔圖案都有得揀，甚至有以節日、生日及婚禮等題材相框，可以在拍照前或後，加入相片之中，大約只要3-4秒左右就完成，使用相當簡單，可惜合成照只能用到300萬像素，晒3、4R都勉強夠用。

■要加入相框，只要轉到SCN再選畫框合成。

■按入畫框合成，就有大量相框任你揀。

■2.7"雖然唔算好大，但勝在顏色準。

24倍長炮

旅行拍照要咩功能？計我話甚麼都係假，有支好鏡頭就實用好多，X70具備一支24倍光學變焦鏡頭，焦距相當於26-624mm，代表有遠攝能力之外，亦可享受到26mm廣角，即所謂長短火有齊，影相尤其方便，睇人拎單反要一大袋鏡，用X70就可以一機走天涯，梗係輕鬆好多！
除咗影遠影Wide外，仲可以使用1cm超微距拍攝，用來影花影昆蟲特別耍家；好多人最怕手震，X70就靠SR防震系統，利用CCD防震及ISO6400，即使開盡24倍變焦，相片都好穩定。其他好玩實用功能包括每秒11張500萬像素相片連拍、720P高清影片及快速臉部辨識等。