天主教香港教區陳日君樞機退休前親自入廚，喺教區電視節目入面示範撚手菜上海紅燒肉，八方日前已作報道，並且介紹呢個「樞機版」紅燒肉煮法。有人向八方報料，話有位好神心嘅婆婆，睇完八方報道照辦煮碗，點知半路中途唔對路，樞機廚房慘成「地獄廚房」，搞到一鑊泡。
婆婆煮唔掂紅燒肉
呢位咁聽樞機話嘅婆婆，事後致電請教陳日君，可惜主教不在，為免令fans失望，據講有關方面急call製作人員回覆婆婆，講解煮呢味餸竅門畀婆婆聽，等佢有啖好食唔使心掛掛。八方要強調，樞機下廚有板有眼唔係地獄廚神，婆婆煮唔出上海紅燒肉，乃係因為八方報道煮餸步驟時太簡化所致，如果依足樞機指示，應該唔會失手。
八方班門弄斧，其實樞機紅燒肉喺教會內相當出名，可以話係名聞遐邇，冠絕筲箕灣，因為陳日君以前住筲箕灣，只要傳出佢下廚消息，其他教堂嘅人收到風就會自動報到。陳日君退休後多啲時間入廚房，教會中人有口福了。