早排社民連三子喺立法會用粗口炮轟官員，「吊吊fing」嘅政務司司長唐唐連還發信畀主席曾鈺成，要佢畀個交代，呢個燙手山芋，聰明如曾主席，即刻塞畀內會同議事規則委員會處理。噚日立會內務委員會就討論呢件事，主席劉健儀又點會唔知事件麻煩，即時拎議事規則委員會出嚟做擋箭牌，話等委員會研究有結果，再通知唐唐。
不過唐唐今次忽然追數佬上身，係咁發信逼立會做嘢，唔少議員好唔高興唐唐藉佢哋過橋討好班公務員，葉劉就寸唐唐，話佢封投訴信英文寫得好曳，隨時貽笑大方，要劉健儀向唐唐反映吓。
有議員私下揶揄葉劉，如果真係咁唔妥政府，就唔好向小問題埋手小罵大幫忙，一係好似泛民咁玩鋪勁，投票反對預算案！