家庭影院越嚟越流行，連專業級器材也大打家庭客主意，好似專門生產鑑聽級喇叭畀錄音室用嘅芬蘭老牌喇叭生產商Genelec，近年都出咗啲平民版嘅鑑聽喇叭。佢哋其中一款機身最細嘅6020A，啱啱殺到香港。
亞洲高清協會會長Alan話，唔好睇小佢外形細細，體積只有226×151×142毫米，但啲聲絕唔輸蝕畀大喇叭。呢款係主動式喇叭，唔使靠後級推，優點係效率高，啲音質份外清晰。
忠實重現原音
6020A係兩音路喇叭，高頻係四分之三吋金屬震膜，低頻就用四吋圓錐震膜，而高低頻輸出各由一組獨立20W功率擴音機嚟推；Alan話：「雖然係平民版，一樣保持番鑑聽級嘅風格同質素，就係啲聲音好準，原汁原味忠實重現原音，唔同其他喇叭咁加咗味精。」
Alan又講，6020A細細座擺位固然方便，外形設計又討好，設計簡約利落，有黑、白兩種顏色，擺喺客廳都好靚仔。
問起價錢，Alan話Genelec以往賣畀錄音室嘅鑑聽級喇叭，一隻講緊幾十萬，而呢款平民版嘅6020A，一隻賣4,500蚊，就可以踏入鑑聽級嘅門檻，算係超值喎。咁大家睇完係咪都唔覺得貴？