唔怕生壞命，最怕改壞名，賭場亦然。開業未夠兩年、號稱澳門首間六星級豪華賭場酒店嘅皇冠酒店，忽然搞搞新意思，宣佈今個月27號起改名為「新濠鋒」。當地賭業中人對此議論紛紛，有老行尊話，喺澳門打滾幾十年，罕有聽聞賭場喺冇換新老闆情況下改名，相信換招牌另有玄機。
皇冠改名「新濠鋒」
皇冠年前開幕時，話事人賭王乖仔何猷龍重金禮聘「賭神」發哥拍廣告做代言人；有人笑指今次呢鋪連賭神都唔掂，事關內地收緊自由行，加上金融海嘯冲擊，澳門賭業進入寒冬，個個場生意都大跌，送酒店房、船飛、泥碼都冇符，小賭王見勢色唔妥，一於發功改名，好有可能想轉個運一鋪翻身。
「濠鋒」呢個名又有水又有金，一睇就知唔簡單，八方請教玄學家楊天命，佢指濠字係水字部，加埋代表豬嘅豕字，而豬又屬水，兩者相加真係超級旺金旺水；而個鋒字亦有個金字，金又能生水，楊師傅話濠鋒堪稱招財絕配！
不過個名都要同命格配合至得，楊師傅話，如果何猷龍係夏天出世就完美，旺上加旺。然而另一玄學家麥玲玲就有唔同睇法，佢認為皇冠呢個名唔算差，反而新名有個鋒字，日後可能引來打鬥、相爭；做生意志在和氣生財，有拗撬嘅地方難聚財，所以改咗名都未必好。兩位師傅所言各有道理，賭仔信唔信邪隨得你，不過賭場篤信風水係事實。
曾禁荷官戴錶打呔
皇冠前年開幕時，一度禁止荷官戴手錶同打呔，八方聽聞都係同風水有關，可惜千算萬算，算唔到原來可能係個招牌累事。風水之說信則有，現代賭場係管理嚴謹大企業，唔係擺個陣就豬籠入水，有行內人指皇冠錯不在個名，而係地點先天不足，位處氹仔一隅，人氣唔夠旺，莫講財氣。
皇冠之前搵發哥省招牌，走豪華路線，但家陣歐美賭客幾乎絕迹，所以求變唔再玩高檔，日後主打亞洲豪客，同時改個比較親民嘅名，入去新濠鋒，賭得好輕鬆。既然鮑參翅肚唔啱食，茶餐廳車仔麪又一餐，虛名嘅嘢，唔值錢嘅。
mailto:[email protected]