今個季尾實在令人振奮，尤其係英超躉，冇得唔同楷哥旗下嘅「現在台」續約，明年的歐聯同世盃點算？下季再算！今次貼士，主力捧另一收費台嘅直播大戰，季尾回起的飛燕諾主場可殺低川迪（球賽編號：星期六70；無綫收費電視26及now826台明日2:45am直播），平手盤冇得輸！
力爭歐洲賽資格
來季冇歐聯又冇世盃，但「現在台」叫人續約冇減價，小弟花盡唇舌，才因減去部份自己不會接觸的台號而減2、30蚊，而條件當然要續約兩年，如果唔係英超，真係睬佢都儍！
唉，鬼叫英超雲集世界球星，開賽時間又正，個個都一路話又係Big4玩晒好悶，咪又係安坐家中，周末睇英超，周中睇歐聯？下季會唔會同「畸寶」續前緣，睇吓佢哋開乜價錢再算啦。其實我最喜歡睇無記收費台，而且有我主攻嘅荷甲同英冠，我仲係810生活台嘅擁躉。
講番今晚荷甲，免費台播阿爾克馬爾捧盃，但賠率冇肉食，我還是想睇想投注收費台嗰邊播嘅飛燕諾迎川迪。前者近幾季走了沙洛文卡勞，尹佩斯同古積特等現時躋身Big4的球星後，排名每下愈況，今季季初更差，炒了上任不久的教練韋比克，一度跌落下游；幸近況轉好，目前排第10，仍力爭踢歐洲賽，而最重要近期復出的中場工兵蘭沙特作用極大，上仗大炒荷華高斯，此子亦有入波。除狀態好，今次面對係近6次主場交手，全敗走而回嘅川迪，開平手博主隊極穩。其實我認為阿積士點睇都較川迪有機會後上攞第2，來季踢歐聯。
查爾頓「主勝」冷味濃
另一注博條3串1，維拉反底贏韋斯咸、狼隊氣走踢風流波嘅昆士柏流浪，奠定升上英超大業，同幾可肯定來季降落英甲的查爾頓，主場打敗黑池。查仔近期冇壓力下表現不俗；今次我會進取啲，博埋4.4倍嘅「主勝」。
近5場往績：WWWLW
蘋果波神
水準有目共睹，長跟必有着數。