吸毒、影淫照、走音，今日樂壇越烏煙瘴氣，越勾起人對關正傑的懷念。以兼職性質加入樂壇的建築師關正傑，雖然永遠都似一碌木站在台上獻唱，從沒有花巧舞步，但不論他演繹豪邁剛烈的《萬水千山縱橫》，還是柔情似水的《人在旅途灑淚時》，都能令萬千觀眾入迷。加上入行多年零負面新聞，正氣到被視為香港樂壇的一個異數這一點，更是深得觀眾歡心。可惜88年關正傑退出樂壇移民美國西雅圖，從此銷聲匿迹。
過去20年來，不少人如顧嘉煇、張耀榮、黎小田、丘亞葵、香港電台、無綫還有亞視甘詞厚幣游說他復出，全都無功而還，就算張國榮、梅艷芳或許冠傑一個個輪住復出再賣個滿堂紅，關正傑也不為所動，因為愛唱歌的他，更愛建築事業愛家庭。現年60歲的關正傑，原來已由建築師搖身一變成為西雅圖發展商，做起樓工程。
他日大家稱讚婚後退出藝能界的日本山口百惠如何意志堅定時，請不要忘記，我們也有個香港製造的關正傑。
撰文：戴彩煥 圖片提供：香港電台
周梁淑怡代澄清不實傳聞
周梁淑怡既是關正傑聖保羅男女中學及港大師姐，也曾擔任他的經理人，關正傑82年在灣仔伊館舉行的首次個唱，及83年與陳百強、葉振棠、葉麗儀和汪明荃在紅館舉行的「白金巨星音樂盛會」演唱會，也是周梁淑怡的富才製作公司一手包辦。今日，雖然一個從政一個退休，大家身處天南地北，但二人仍有保持聯絡，相交40餘年。周梁淑怡說：「中學時我幫過佢補習，佢最初係唱folksong，後來先至唱電視劇主題曲。當年同佢搞伊館個唱，仲首創香港歌手搵香港管弦樂團伴奏先河。」
怕九七移民美國
傳聞關正傑當年兼職做歌手期間，遭建築公司老闆炒魷魚，但周梁卻代老友澄清：「佢唔係俾人炒，係80年代初建築行業市道唔好，佢自己停咗一輪。佢同太太都係architect（建築師），佢哋移民西雅圖初時諗住唔做嘢住，但去到嗰邊覺得太悶，尤其係佢太太係個好能幹嘅專業人士，所以兩個後來做番嘢，家仲做咗發展商㖭。」究竟關正傑移民是否因為怕九七？周梁淑怡說：「都有少少啦。」
據聞周梁淑怡曾勸老友不要復出，對此她急忙澄清：「冇冇冇，我仲好歡迎㖭！久唔久都有人想搵佢做騷，我去過西雅圖探佢，都有問佢呢個問題，但佢即刻耍手擰頭話：『好耐冇唱啦！開演唱會要練歌㗎！』」傳聞另一則，是關正傑多了一個大肚腩及頭髮稀疏，所以多年來堅拒曝光，但周梁淑怡卻謂：「佢3年前返香港時我見過佢，佢冇乜點變，同以前差唔多。」
顧嘉煇 親自邀復出碰壁
為關正傑寫過《倆忘煙水裡》等經典金曲的顧嘉煇，第二次舉行《煇黃演唱會》前，曾親自駕車由溫哥華到西雅圖游說關正傑復出做嘉賓。顧嘉煇說：「嗰次我揸兩個幾鐘頭車去，又專登帶埋第一次《煇黃》張LD送畀佢，請佢食飯，結果佢唔畀我埋單。佢話退咗休唔想再露面，相信好多人搵佢都唔成功。佢家喺西雅圖係做發展商起樓，佢都仲好鍾意音樂、好鍾意唱歌，但脫離咗呢個圈咁耐，冇興趣返出嚟再唱。當日見佢個樣冇乜點變，只係肥咗少少。」原來，關正傑還是一名電腦發燒友。煇哥說：「80年代喺寶麗金做錄音師嘅區丁玉教我哋玩電腦，Apple一出mac機我哋已經開始用，關正傑對電腦好發燒。」
倪秉郎 當港台說客失敗
現為港台電視部高層的倪秉郎，早年在港台二台做DJ及監製時經常與關正傑接觸。倪秉郎說：「關正傑係一個好滋油淡定嘅人，佢講嘢好慢、好多停頓、好多咿咿哦哦，有次同佢錄一個半小時訪問，結果錄咗2、3個鐘。關正傑鍾意玩風帆，好享受生活，對名利睇得好淡。10年前我移民溫哥華之後，接到吳錫輝電話，話港台70周年，想我幫手搵關正傑做個懷舊騷，於是我去西雅圖搵佢。當日佢約我喺一間酒店食自助午餐，話星期日多數同太太以及仔女嚟呢度食自助餐。我同佢講話港台想搵佢做騷，點知佢話：『唔得、唔得，淨係做訪問聽把聲就得，我唔想見到樣。』其實佢同以前一樣冇乜點變，只係肥咗少少。」
區瑞強 難忘正派大師兄
曾跟關正傑一起效力寶麗金及EMI的區瑞強說：「佢係第一代攞住結他唱民歌嘅歌手，係我大師兄，70年代我哋已經認識同合作，試過一次同佢、林子祥三個人喺大球場唱民歌。佢係一個familyman，好少soical，次次見佢唔係工作就係陪屋企人。關正傑同佢太太Margaret一樣都係architect，佢曾經話過唔係好適合呢個圈，因為佢好享受家庭樂，覺得成日冇時間陪家人，所以自從佢大仔出世（之後還有一女，二人現年20多歲），佢嘅演出都減少咗。關正傑係個好正派好守規矩嘅人，有次我哋去打網球佢揸車，條路寫明開40咪，佢就真係開30幾。」
葉鏡球 踢爆仍掛念香港
曾在寶麗金、康藝成音和EMI唱片公司擔任宣傳部高層的葉鏡球（AlanYip），先後跟關正傑合作，關正傑退出後，二人仍有聯絡，不少人找關正傑復出，都是透過AlanYip做中間人。AlanYip說：「我都探過口風，聽到佢話唔想、冇興趣，我就唔再問落去。以前佢一放工就同太太一齊錄歌，即晚就可以錄起一首。每次同佢傾電話，佢都會問我香港變成點，佢好掛住香港，久唔久都會返香港行吓。」
娛樂資料庫：關正傑年表
1949年3月27日
於香港出生
1967年
與好友何國禧等組成TheSwingingMinstrels民歌隊，參加業餘歌唱比賽摘冠，並開始任無綫《視聽蔡和平》節目嘉賓，手抱結他唱民歌
1968年
灌錄首張EP《TalentTime'67Winners》
1969年
畢業於聖保羅男女中學的關正傑，考進港大建築系，同年以個人姿態推出單曲《Cecilia/Ain'tThatRain》
1978年
推出首張個人專輯《近代豪俠傳》
1979年
加盟寶麗金，推出大碟《天蠶變》，首摘白金唱片殊榮
1981年
轉投無綫
1982年
在灣仔新伊館舉行首個個人演唱會，同年獲選為香港十大傑出青年
1983年
離開則師樓與友人組公司
1985年
獲英女皇頒授榮譽獎章，由當時的港督尤德爵士為他戴上勳章
1988年
出版最後一張專輯《一個秋天》退出樂壇
90年代初
與妻子及一子一女移民到美國西雅圖，繼續其建築事業
資料來源：《蘋果》資料室
小八卦：唱盡三台劇作
關正傑是少數歌聲響遍三台：佳視、麗的及無綫的歌手。70年代，粵語歌抬頭，許冠傑與劇集歌曲大行其道，早於78年關正傑曾為無綫劇集《近代豪俠傳》唱主題曲，後為佳視唱了不少劇集主題曲，包括《武林外史》及《神鵰俠侶》等；79年為麗的唱的一系列劇集歌曲如《天龍訣》、《天蠶變》、《大地恩情》等傳誦一時，與無綫的鄭少秋和羅文分庭抗禮。至81年關正傑加盟無綫，為劇集《英雄出少年》唱主題曲，正式開始其事業高峯。《天龍八部》系列歌曲更是膾炙人口。
出碟兩日破白金
81年是關正傑事業高峯的一年，當年推出的《英雄出少年》賣個滿堂紅，上市兩天即奪白金唱片兼賣斷市，紀錄至今無人能破。
關正傑曾推出18張唱片，當中有10張達白金唱片銷量，包括《天龍訣》、《天蠶變》、《人在江湖》、《關正傑名曲選》等，創下另一紀錄。
遇女歌迷勁怕醜
關正傑形象正氣、聲線雄渾，唱過不少勵志歌，80年代很多政府宣傳歌也是由他主唱，如《一把聲音》及《蚌的啟示》等。雖然其外表陽剛，但原來很怕羞，一次有女歌迷上唱片公司詢問個唱購票詳情，關正傑剛巧步出，女歌迷驚得扭頭就走，誰知關正傑更怕醜，急急跑回房。
尋人
關正傑退出娛樂圈已有20年，樂壇對你十分掛念，見字速回。如有關正傑最新照片或消息，請速向《蘋果》娛樂版提供資料，可電郵至mailto:[email protected]。
