弈中國象棋，兵難與車匹敵，但每到殘局時，兵的作用又往往遠超想像。「兵工廠」阿仙奴周六對盃賽老手車路士的行情稍被睇淡，實情是一場過準決賽高下難分，而眾小「兵」首次進軍新溫布萊或踢出不一樣的戰意。這場「兵」「車」戰，值得投受讓平/半的「兵」一票。
藍鑽石
球賽編號：星期六54
阿仙奴vs車路士（now671台直播）
00:15 19/04
英超、歐聯還有英足盃，列強早已殺得天旋地轉，加上波路熟，不是「殘局」是甚麼？阿仙奴雖然中後場有大量傷兵，計有加拿斯、艾蒙尼亞、基捷基治以及新傷的基蘭基比斯等，幸近仗臨危受命的施維斯達與桑治並沒大錯漏；至於中前場更因傷兵陸續復出而人才濟濟，可以說，阿仙奴已跨過季中的難關。「兵」既已過河，可打橫行，威力不可同日而語。
艾沙維可接力發功
阿仙奴是今季Big4球隊對決中，暫時表現最突出的一隊，聯賽贏過曼聯、車路士及媾和利物浦。在盃賽，尹佩斯表現特醒，今季在各項盃賽已入8球，可別數漏一個有資格參戰英足盃的艾沙維。此君來投後閃電融入球隊，與法比加斯可為前線作出源源不絕的供應；看他上周大勝韋根時勇於上前，所射入的一球充份顯示他勤於走動，具埋門觸覺，絕非交行貨。
車仔後防欠穩
車路士剛漂亮地挫利物浦入歐聯4強，但近3仗共失8球，怎樣也說不過去；再看施治近期騰騰震，出迎應付傳中或封擋時間完全拿揑不準，鋼門本色蕩然無存。車仔的後防顯然存在危機，就算周中對紅軍時停賽的泰利，今復出坐鎮後防，亦未必可堅壁清野。
談到進攻，不見得車路士近仗行雲流水，上仗在連拿送禮前，車路士根本沒任何具威脅的埋門。阿歷士洛里高、伊雲洛域的神來之筆，只是偶一為之，數來數去只得林柏特、杜奧巴或安歷卡具威脅；相比之下，阿仙奴除尹佩斯外，艾迪巴約、禾確特甚至伊度亞度達施華都獨當一面，變招本錢甚至比車路士更多。今仗吼阿仙奴不敗開下盤，至於能否贏波，取決於可能正選的敗家仔賓特拿的表現。
賽制
準決賽在溫布萊舉行，若90分鐘言和需加時（上、下半場各15分鐘）。若仍未分出高下，則互射12碼決勝。
星期六54
阿仙奴vs車路士
半全場：主/和
盤口：阿仙奴受讓平/半
讓球：下盤
1:1
花絮：阿仙奴3主將勢續約
剛啱打入歐聯4強嘅兵工廠，未同車仔交手先有唔少利好消息傳出冲喜，好似有傳季尾會離隊嘅尹佩斯同埋法比加斯，最終會同球會續約，繼續當「兵」，而歐聯入球功臣之一嘅禾確特更加續約成為球會最高薪球員之一，班球員前景明朗，比賽都醒神啲！
花絮：車仔較熟新溫布萊
溫布萊球場歷史上，今次係第10次進行英足盃準決賽賽事，而阿仙奴同車路士亦係首次喺新溫布萊球場爭入英足盃決賽。不過，車仔球員去年曾經喺新溫布萊同熱刺爭過英聯盃冠軍，而兵工廠就第一次踏足呢個球場，所以講到熟習球場，車仔可能會秤先少少。
花絮：科特迪瓦球員內訌
周六之戰，除咗係倫敦雙雄交手之外，亦係非洲球員一次火併，尤其科特迪瓦更合共有4位球員內訌，車仔嘅杜奧巴連同沙洛文卡勞，將會聯手挑戰國家隊隊友伊保爾同高路托尼嘅兵工廠防線，睇吓科特迪瓦嘅矛銳，抑或係盾夠硬？
花絮：撬艾迪巴約擾敵？
大戰當前，擾敵之計總會大派用場，好似車路士就傳出會用銀彈政策撬走阿仙奴前鋒艾迪巴約，目的係作為聘請AC米蘭教練安察洛堤嘅籌碼，呢位多哥國腳又會唔會因為錢而中計？