立法會今個禮拜星光熠熠，任總出場接受議員質詢後，今日輪到另一個重量級人物登場──新世界純官。佢今日出席梁展文事件專責委員會聆訊，應該係首個大孖沙級人馬去到立法會接受議員盤問，唔少人都對呢場「鬥地主」大戲十分關注，不知純官記憶力有幾強，如果好似其他官員咁乜都唔記得，恐怕難逃「失憶證人」稱號。
據知純官已向委員會提交書面陳述書，內容頗為簡單，僅一、兩版紙，同之前已公開嘅聘請梁展文過程資料冇大出入。
根據安排，今日會由長毛重點「招呼」純官，估計會集中詢問純官如何認識梁展文，同埋兩人交情有幾深，另一關鍵係誰人穿針引線推薦梁展文入新世界，如果唔詳細交代，隨時甩唔到身。