王菲婚後淡出娛樂圈4年，直到最近終於出山，曾請成龍拍廣告嘅內地霸王洗髮液開出2,000萬人民幣天價邀請佢擔任代言人。今個月初王菲去咗泰國拍攝本月內播出嘅電視廣告，而且佢仲非常好運，喺發生親他信紅衫軍暴動前啱啱完成外景，平安撤離泰國飛返北京老家嘆世界。
復出被睇好又有2,000萬落袋，廣告商更聽從王菲意見，由佢為洗髮液改名，難怪王菲心情靚絕，日前仲約咗幾個朋友喺北京一間咖啡室嘆茶傾偈，傾到三更半夜至離開。
馮小剛斟拍戲
當晚素顏嘅王菲戴黑框眼鏡，圍大披肩同着住闊褲，向來我行我素嘅佢懶理途人目光，同朋友坐喺室外開揚位置，其間佢傾傾吓忽然成龍上身，兩隻腳「動L」，成個人踎喺凳上，一時吓耳珠，一時嘴扁扁，表情多多。
呢排內地仲傳王菲會接拍馮小剛新片《唐山大地震》，馮小剛講過投資方對呢部電影冇上限，佢絕對有能力開天價誘王菲演出，之前王菲連內地演唱會都婉拒，原因係開騷要搞一大輪，一場騷都係賺三兩百萬，與其係咁不如拍廣告，做幾日嘢就千萬落袋，所以王菲拍戲機會應該唔大。