寇鴻萍逆市蘭桂坊開設意大利餐廳，前晚開幕酒會，一對女兒唐貝詩（Lydia）、唐貝欣以金色短裙孖妹撐場，出席的有謝寧、劉香萍貝安琪母女、梁嘉琪、陳伶俐等，譚凱琪則性感大露背示人。
唐貝詩否認曾隆鼻
唐貝詩謂密密為新餐廳試食，增磅不少。早前被傳打針整高鼻樑，她一聽就說：「又高咗？唔知，可能係塊面瘦咗，或者髮型轉咗啫。媽咪係香港小姐，佢成日話我又肥又矮，但我得20歲，整容聽到都覺得痛。」媽咪寇鴻萍則指女兒除非工作需要或受傷，否則未需要整容，但她踢爆Lydia其實一直想整容，她說：「Lydia兩年前都投訴，話全家個個隻眼都咁大，得佢自己隻眼唔夠大，話叫我介紹整容醫生畀佢，激死我！」
此外，汪詩詩、陳沛嘉等出席酒會前，先去shopping及在CafeLandmark嘆下午茶，傾女人經，眾人細聲講大聲笑，不知有無影響隔兩張枱傾公事的陳嘉上？
採訪：羅慧敏、娛樂突發組
攝影：陳慧安