花旗香港區行長章晟曼曾經代表中國人踏足國際舞台，擔任世界銀行常務副行長，06年出過本簡體字版嘅《先站住再站高》，講番當時經歷。華華噚日收到呢本書嘅繁體字版，以為事隔3年章行長再出新書，點知原來係非賣品，印量有限，呢個周末會派畀學生。
限量版只畀學生
事緣花旗有份搞嘅中學生模擬網上股票買賣比賽，呢個禮拜六開始，參加嘅都係中四至中七學生，公關為送畀學生嘅手信度咗好耐，後嚟有人提議，不如送章行長本大作啦。
據知，一向低調嘅章行長，一聽到要幫佢出書，都唔多想，覺得太個人化。不過，當知道係送畀青少年做手信，咁又唔同咯，佢唔止同意，仲寫咗封信夾喺書度，鼓勵同學，提醒佢哋「機會只會留給有準備的人」。仲話佢有今日嘅成就，個人務實態度、勤勉同努力都唔少得。