伊健同城城套《風雲2》年底先上，但卡通版《風雲決》早喺08年已橫掃大陸影壇，票房超過3,300萬！搵到錢，兩位年輕老闆以靚車獎勵自己，一個揀黑沉穩重、直路加速恍如麒麟臂般澎湃有勁嘅BenzML500；另一位買入GT-R，四驅入彎如風神腿般靈活瀟灑，各有Style，簡直就係聶風同步驚雲上身。
記者：徐影龍 攝影：梁細權
雲無常 外表不停改
兩位《風雲決》總舵手原來係親兄弟，大佬Gordon為製作單位方塊動畫CEO，現實中真係有幾分似步驚雲，揀車單純外表先行，每次換車，都會將車殼喪搞，包圍、頭尾燈、尾翼甚至拉花等，久不久又手痕訂件配件返嚟改，總之賣相要不停變，但出奇地性能方面就一啲都唔搞。新寵BenzML500，Gordon貪佢線條硬朗有霸氣，海嘯靚價88萬入貨，左噴右改再花13萬，偏偏不喜歡專屬改裝AMG，大部份用上Brabus改件，如尾翼、頭燈、腳踏等，最滿意係喪玩黑色誘惑，四條Brabus軨、頭燈燈罩、鬼面罩等，全部由電鍍改為噴黑色，更硬朗兼有神秘感。
Gordon住港島半山，ML500行V8偈，上大斜當然無難度，「初揸時覺得啲彎唔夠好，轉SportMode後四條避震較硬，又夠力出番彎，遇着連續S彎都行得好順，從此SportMode行晒唔再轉喇。」
BenzML500規格
5,462ccV8引擎、388匹、7G-Tronic、四驅
風無相 電腦搞晒夠瀟灑
細佬Leslie性格跟大哥截然不同，揀車唔要巨，換過Alfa147、AudiTT至今日呢架新玩具GT-RR35，全部都係跑味掛帥，「我揸車鍾意爽爽快快唔論盡，之前嘅車我都好滿意，但揸過GT-R後，佢副電腦真係幫我處理好多嘢，入彎出彎自動Tune到最Fit數值，遇着大長直路，又或鬧市塞車，GT-R都自動調到最佳Setting嚟行，我只需要專心路面情況就得，咁多架車算係揸得最瀟灑嘅一架，基本上已係我唯一嘅代步車。」
入彎過彎夠瀟灑，原裝出廠已經有480匹馬力，一定去到聶風「劍快、箭快、我最快」嘅境界啦？「我本身唔鍾意飆車，都係好斯文好安全咁揸，阿爸阿媽都好放心我買GT-R。」總有嘢改裝啩，「我諗緊換唔換Mine's副加50匹嘅電腦，雖然用唔着，但又心思思想架車再猛啲。」係呀，聶風初期都好乖仔㗎，不過揸多一排GT-R，難保不自覺越揸越快，最緊要唔好學聶風咁入魔就得喇。
NissanGT-R規格
3,799ccV6Twin-turbocharged、480匹、六前速半自動波、四驅
