港股果然創出反彈新高，但亦如所料，第一次衝關不遂，結果倒跌收場。恒指最高逼近萬六大關，報15977，但高位阻力大，好快就掉頭回落，午後更曾倒跌152點，收15582，跌86點。
大市單日轉向，相信要整固一段時間，才會再衝高位，或需再試多一兩次，才能破關而上。大市急升後調整，好正常，現時10日線（14872）同20日線（14202）升勢頗急，恒指只要能守穩在20日線之上，後市仍可樂觀。
中國外運（598）有消息，傳母公司再注資嘅時機已成熟，好事隨時會來。中外運昨跟大市調整，收1.51元，跌5仙。
過去3個多月，中外運走勢形成大圓底，頂部在1.60元，亦剛好係250日線（1.599元）所在，呢個位肯定有壓力，噚日借勢調整，但要到實，一破位而上，就確認開展牛市大升浪，升勢可以好勁，升幅亦會好大。
手頭現金逾44億
集團為物流服務供應商，主要向客戶提供海陸空貨運代理、國際快遞，以及倉儲同碼頭服務。在金融風暴衝擊下，業務難免受到影響，08年（12月年結）營業額410億元人民幣（下同），升2.2%，股東應佔盈利5.68億元，減32.2%，每股盈利13分，末期息2分。
盈利減少，主要係集團持有小量的遠期燃油和遠期日圓兌美元合約，以對冲油價和滙價波動風險，在08年底，錄得賬面虧損3.1億元，但踏入今年以來，浮虧之數已大幅收窄。中國經濟頗大機會見底回升，對中外運有利，09年盤數會靚好多。
業績可放心，睇番最吸引嗰瓣，就係公司手頭上有現金44.5億元，有足夠財力進行兼併壯大。公司在去年初完成第一次注資，以11.06億元向母公司收購7個地區的貨運代理及倉儲資產，今年會進行第2批注資，並計劃在兩三年內投資100億元，力爭成為中國最大的物流供應商。公司滿肚密圈，一落實有行動，對股價會有刺激。
09年，盈利可回升到9億元，每股盈利21分，約24港仙，預測PE只6.3倍。大圓底形態一突破，長期收集完成，照度上去，初步上升目標2.10元。
郭兆誠