政客專長講嘢，與生俱來乜都可以拗一餐，立法會行政管理委員會噚日閉門討論位於添馬艦立法會新大樓落成後，入面間餐廳應否開放畀公眾使用問題，八方聽聞議員意見分歧，未開飯已經拗到飽。
有關方面估計，新大樓開放後會成為熱門景點，假如入面間餐廳全民開放，閒日被自由行攻佔，星期日成為外傭蒲點，7.1遊行後大家走去醫肚，立法會塞爆食飯嘅市民（簡稱飯民）成何體統？議員、職員甚至記者都冇啖好食，無日安寧，因此有議員認為應該封殺飯民，留番啲清靜空間，但亦有人覺得議會應該open啲，開放餐廳以示立法會支持飯民。
應出草案諮詢普羅飯民
立會新大樓由納稅人付鈔，餐廳淪為議員私家飯堂，飯民時未到7.1已經上街，冇理由你吃飯、我付鈔，立法會秘書長吳文華亦在會上指出，唔少外國國會大樓嘅餐廳都全民開放，香港應否效法，議員要周詳考慮。噚日會上眾人拗餐飽未有結論，決定擇日重賽，既然呢個問題咁重要，八方認為最好先出白紙草案諮詢市民，再立法規管，咁先係尊重民意吖嘛！
計八方話齋，呢條應該暫定為《立法會食飯開餐條例草案》，主要內容係限時限刻市民使用立法會餐廳，內附食飯時間表，開餐路線圖，飯民入到去要規行矩步，唔可以不進則退，餐廳嚴禁飯民食蕉、掟蕉，如果想學議員掃枱，可與職員聯絡作特別安排，立法會餐廳可以「碌」卡片埋單，但只限慣用卡片證明入息嘅高官，飯民無此着數。
就算飯民可以入立法會開餐，最快都要等到2012年新大樓落成後先食得，政府噚日就宣佈，待立法會搬屋後，現時立法會大樓會改為終審法院。呢幢大樓喺1912年1月15日落成，由建築師IngressBell同AstonWebb設計，充滿新古典主義特色，外圍有17米高古希臘式嘅圓柱，迴廊則係遠東建築特色。
古物古蹟辦事處執行秘書明基全話，大樓外部已列為法定古蹟，唔可以折除破壞，會原貌保存，內部裝修亦會盡量保留原有特色。
mailto:[email protected]