IT人唔打呔上班一度帶領潮流，家陣唔少對冲基金高層亦改着休閒裝返工，但人哋一身名牌，價值唔會比一套西裝低。呢股休閒風氣帶到華爾街，喺經濟好時大家唔覺有問題，到金融海嘯刮起，有啲人可能因為過去着衫隨便而成為被裁嘅首選，女性更首當其衝。
着平底鞋唔夠權威
華華睇《華爾街日報》一篇專欄文章講，上星期舉行嘅「對冲基金界女性100強」大會，唔少女性管理層話，喺機構裁員、人浮於事嘅環境下，女行政人員被裁員或者求職失敗，好可能同衣着有關，因為衣着配飾係好有力嘅象徵，比如女性着高跟鞋，唔止因為好睇，原來因為着平底鞋畀人感覺似細路女，唔夠權威，套裝就令員工表現出對工作有承擔嘅良好印象。
女士裝扮花款極多，但容易出錯，家陣搵工，更家唔可以着錯衫，因為機會大把人爭。
以前一條名牌圍巾，可能係財富同權力象徵，家陣只會畀人覺得唔夠節制。着衫果然係一門藝術。