大學生影畢業相，手持小熊，甚至手抱洋娃娃嘅，近十幾年來，甚為時興，陶傑以此為題材，亦寫咗好多篇。大學畢業，出社會做工咯噃，仲要攬住洋娃娃？不過有時聽見一啲父母叫已入大學嘅兒女為baby，咁就一啲都唔奇，既然父母成日以為兒女不懂事，照顧到無微不至，由兒女入幼兒院以至入大學，都係態度一貫嘅，啲兒女點會成熟呀？唔怪得入到大學圖書館，聽到館員叫大學生為「同學仔」，初初聽見，覺得好笑，諗深一層，就一啲都唔好笑。
問一位館員，何解叫大學生為「同學仔」？佢在圖書館工作凡三十年，曾見好多高官名人在大學讀書，當年讀書時都經過佢手借書，佢對一啲名成利就嘅叻仔叻女，仍然如數家珍。佢話：「稱呼大學生為同學仔，係最近幾年之事。大學新生好似一年比一年不成熟，大頭蝦到極，在圖書館遺留手機、荷包、私人物品者，數不勝數。記得啲高官仍然在校之時，呢類事件比較上少好多。」
既然仔女入咗大學，畀佢哋自己管自己，撞吓板，從錯誤中學習，係培養仔女成熟嘅好方法，但係香港父母每每愛護子女心切，往往有事就代為出頭，咁就向子女送出錯誤信息矣。一位女學生在圖書館唔見咗荷包，用手機向媽咪報告，並叫圖書館人員：「唔該你同我媽咪講！」館員為之愕然。學生失物，圖書館會備案，叫所有館內人員留意，搵番荷包就送回嘅啫，點解要「同你媽咪講呢？」館員不允，次日佢嘅波士就收到「媽咪」投訴，話館員態度不友善，不關心學生！有咁充滿愛心嘅媽咪，女兒讀完大學之日，怕仲係要媽咪代選新衣影相，代揀埋洋娃娃㖭。
好幾年前，有中學生參加英語遊學團，到咗英國後，有學生唔鍾意床板硬，食物難啃，打電話回港向家長哭訴，家長向主辦單位（一間著名機構）問罪，搞到該機構立即派人到英國實地調查，以後不再辦遊學團，避免家長不滿就投訴。到英國遊學想住大酒店，食安格斯牛扒咩？不過香港家長既有如此作風，學生要求高，有乜稀奇？