「望吓山，望吓海，Macau旅行，紅男綠女聯歡嬉戲……」大三巴觀音像媽閣廟？今時今日你去澳門都唔會再去啦，唔係仲去排隊食豬扒包同葡撻呀嘛？自從威尼斯人等酒店開業後，澳門的焦點就落在氹仔上。酒店以外，仲有不少特色食店，補身人參、魚翅、當歸白鳳丸，全部平民價有得食。
記者：吳允冲
攝影：伍慶泉
手抓秘製人參雞MOP138
皮滑肉嫩帶一點人參味，斬成大大件可以用手抓來吃。
鮮人參配走地雞
星級酒店以外，氹仔食肆少有豪裝，這間名門算是異數。開業數月，主打火鍋，卻有不少特色小菜。最受歡迎的手抓秘製人參雞就用新鮮長白山人參熬汁，可以補元氣、增強抵抗力，功效係咪咁勁不得而知，不過最緊要都係味道好，雞身選用肇慶走地鮮雞，走地雞食蟲長大，又可以自由走動，雞味濃之餘脂肪亦少，肉質充滿彈性，醃製後加上人參汁同煮，煮得僅僅熟，比韓式人參雞湯的「柴皮雞」嫩滑得多。
烏雞打膠白鳳丸
大廚梁師傅祖籍順德，打魚滑打肉丸佢最擅長，加上無窮創意，變出多款鬼馬肉丸，像當歸白鳳丸，以新鮮烏雞拆肉打成膠，混入當歸粉，最啱女士補血，同正版中藥白鳳丸異曲同工。梁師傅在北方工作廿多年，甚了解北方人的口味，特別製作幾款北方火鍋醬，像攻鼻的韭菜花醬、紅腐乳醬，味道濃烈吃不慣都可以試XO醬、沙茶醬，仲有勁辣金牛醬，用牛肉末加四川、湖南、本地辣椒製成，辣香唔嗆喉，食落仲滲出一陣牛香，別處吃不到。
當歸白鳳丸MOP68
以鮮烏雞拆肉打膠，加上當歸粉，入口甘甘哋帶鮮雞甜味，好食﹗
鬼馬蝦芝士MOP58
油炸鬼挺身好新鮮，可吸盡湯底精華，鮮蝦膠彈牙，芝士滲出鹹香。
手打咖喱羊丸MOP58
羊羶味同咖喱味都好突出，如將咖喱羊腩濃縮成彈牙肉丸，羊癡必試。
芝士鵝肝牛肉丸MOP68
牛肉的質感似山竹牛肉，外層葱味濃，內裏芝士鵝肝餡一咬爆漿。
沙鍋大魚頭MOP78
順德名菜，先在大砂鍋內爆香葱蒜，再放入生劏大魚頭同煮。未開蓋已傳出香味，魚雲軟滑絲毫不腥，就連蒜頭葱段都好香口。
卜卜花甲王MOP68
在枱上即煮，兩分鐘後花甲「卜卜」打開就食得。花甲王特別大隻，完全無沙，加上蒜頭、上湯，肉質鮮嫩啖啖鮮味。
名門火鍋（85328993355）
澳門氹仔南京街628號雄昌花園地下
威尼斯人有勁敵
位於路氹金光大道的綜合度假區「新濠天地」預計六月就會開幕，日前舉辦了試食酒會，各間餐廳都派出大廚炮製招牌菜，估唔到最令人驚喜的是吉祥苑的鵝肝菠蘿包同熱奶茶。鵝肝菠蘿包有如升級版菠蘿油，菠蘿皮鬆化，鵝肝入口即溶，麪包鬆軟，perfect！熱奶茶即場用「絲襪」冲，香滑之餘茶味亦突出，好飲過唔少老字號出品。新濠天地包括賭場、三間酒店、商場，當然唔少得HardRockCafé等20間中西餐廳，想親身去試有幾好食，就要等多兩個月喇。
新濠天地：澳門氹仔路氹城金光大道
查詢：85382957800
38蚊排長龍食真翅
去氹仔手信街附近的達榮，38蚊就可以吃到如假包換的魚翅，雖然是頭頭尾尾的雜翅，但同樣補身，入口爽脆似魚唇；那啖湯才是精髓，用魚翅、火腿、豬肉等熬製五個鐘而成，魚翅的精華都溶在湯中，充滿骨膠原，食一碗好過敷mask。
魚翅湯麪MOP38
一碗有幾塊魚翅，麪可以唔食，湯一定要飲晒﹗
魚翅球MOP24/5粒
鯪魚肉中混入條條真翅，魚肉煙韌翅彈牙，炸得鬆脆不油膩。
達榮（85328825596）
澳門氹仔地堡街泉福新村地下1號舖
