經濟唔好生意難做，係人都知各行各業一定競爭激烈，不過估唔到紅頂小巴同的士呢對馬路寃家，都有機會鬥爭飯食。近日搵食車司機眼界越嚟越凌厲，尤其對「貌似」舉手截車嘅人士更為敏感，一啲唔明顯嘅舉手動作，就算係吓個頭，包保都有小巴同的士即時Cut線飛奔向你！不過呢類搶客行為，始終對其他人有好大潛藏危險，我黃師傅早已經收火，唔再同啲後生仔爭一日長短。班行家狼胎就早已見怪不怪，不過噚日遇到個小巴佬仲吹脹，夜晚七點幾，諗住由西灣河向北角兜客，沿途都有架小巴同我拍跳，我快時佢又快，我收慢佢又跟住收慢，總之全程食住我左邊上客條慢線，十足十同我有仇。唉，小巴同的士客路都好唔同啫，咁都唔妥我，莫非條英皇道係你嘅咩。
文：黃師傅