樓市小陽春，之前想買樓嘅朋友，近排開始問敏妮買得未？敏妮嘅答案係──未。根據敏妮非正式兼不科學嘅統計，某家大型發展商推樓盤時，通常都夾正喺樓市大旺或小陽春嘅時候，但當佢推完盤，個市就即冧，幾乎同「秋官效應」一樣，相當靈驗。近排嗰個發展商又大規模推盤，所以敏妮相信等佢推完盤，個市好大機會冧，到時先買都唔遲，家陣未係時候。
不同區難比較
未係時候買樓，唔等於撓埋雙手，既然明知佢就嚟推盤，一推完個市就冧，咁就係時候吼定有乜心水盤。有個一直以嚟都家住九龍東嘅朋友同敏妮講，佢要買樓自住，已經揀咗3個心儀地點，問敏妮邊個最好，3個地點分別係小西灣、九龍東同何文田近太子道嘅樓。
單睇升值潛力，同類型物業，喺港島區嘅一般都會高啲，但佢舉出嚟嘅3個樓盤，樓齡唔同、單位嘅面積又有別，唔可以appletoapple咁比較，而且敏妮覺得買樓固然要有升值潛力，但作為自住嘅樓，仲有一樣唔可以忽視係，究竟層樓係咪配合自己嘅生活。
要配合生活習慣
呢位朋友因工作性質要好夜先收工，佢雖然有車牌，但冇諗住養車，所以一定要靠公共交通工具，但係佢選中嘅3個地點，個個都係夜晚冇公共交通工具直達屋企，一定要轉幾勻車再轉的士，當然一程的士都可以返屋企，但車費相當貴。
雖然佢話唔介意放工要轉幾勻車，但講係咁講，家佢可以半粒鐘之內返到屋企，日後分分鐘要一粒鐘以上，起初唔覺係乜，但日日係咁都咪話唔攰。
敏妮建議佢都係搵返同區九龍東嘅樓，起碼住咗咁耐，習慣咗個社區。如果真係想試吓另一個區，敏妮建議佢不如租住心儀嘅樓盤，過一排真係適應嘅時候先買都唔遲吖！
溫敏妮
http://wanmanli.com/blogs/