開設餐廳、美容品牌及從事金融的寇鴻萍，近日捲入僱傭糾紛。她旗下美容品牌IsaWorkshop前員工向本報投訴，指自辭職後受盡折磨，臨走更遭寇鴻萍誣告偷竊，寇鴻萍則反駁員工操守有問題，補足賠償，無懼指控。
寇鴻萍自創的美容品牌IsaWorkshop，不時都有宣傳活動。本報昨日接到IsaWorkshop前員工謝小姐投訴，指遭寇鴻萍誣衊偷竊解僱，謝小姐表示原本任職銷售主任，上周辭工，前日最後一天上班，發現有專櫃存貨多出兩袋，她叫倉務員點貨及拿走，卻被質疑意圖偷竊。
已向勞工處求助
謝小姐自稱跟寇鴻萍對質期間想報警，但遭寇鴻萍阻止，謝小姐說：「寇鴻萍大聲喝話：『唔准，呢間公司係我嘅，stop！』我同佢嘈，點知後嚟佢仲即時炒咗倉務同另一個同事，我覺得害咗人，好心噏。」她指寇鴻萍無故解僱她們，更出信指她們操守有問題，深感不忿，謝小姐又指IsaWorkshop拖欠她墊支的700元雜誌、洗毛巾等雜費，及沒供強積金，所以她昨日已向勞工處求助，及報警備案。
昨日寇鴻萍接受電話訪問時，表現十分氣憤，她說：「係，我哋噚日係炒咗3個同事。」至於謝小姐指被屈偷竊，她說：「偷嘢係刑事，我唔想多講公司嘅事，總之因為佢哋操守有問題，嚴重疏忽職守，係跟足勞工法例，畀足7日代通知金，完全冇問題。」
「法例7日內畀」
對於前員工指拖欠700元及沒供強積金，寇鴻萍說：「佢哋噚日先離職，我哋會計都要跟吓單，法例係7日內畀，我哋對清楚就會7日內畀番佢哋。我係一個守法律嘅人，喺法治社會，唔供強積金，我唔怕俾人拉咩？總之，我哋一切係依足法例做，唔會犯法。」採訪：DebbieLum