卿姐做咗民主黨副主席後，地位更顯超然，前晚鬍鬚曾喺馬會宴請台中市長胡志強，一向被特區政府不友善對待嘅卿姐，今次忽然矜貴，竟然獲安排坐主家席A枱，同幾個司長及胡志強同枱，而主家席B枱則有民主黨李華明、民建聯黃定光同自由黨方剛，三大黨有齊。
卿姐坦言對獲禮遇好意外，但正所謂無事獻殷勤，非奸即盜，鬍鬚曾咁畀面卿姐，冇理由無所求，唔知同佢要乞民主黨投票支持預算案有冇關係？前晚餐飯雖然胡志強係客，但佢全晚談笑風生幾乎反客為主，致辭時話今次重臨香港，發現好多官員國語大有進步，係人都知鬍鬚曾普通話程度十分普通，胡志強用激將法，應該可以令鬍鬚曾更努力學習刨冬瓜。