一年一度記協籌款晚會下月中舉行，「JA波」係傳媒界大事，記協全年經費食粥食飯靠呢一晚，今年由疑似特首候選人梁振英做主禮嘉賓，男、女主持人係ex新聞王子李燦榮、ex新聞之花繆美詩，飛哥同前高官肥馬則應承負責拍賣環節，負責揼心口幫手籌款。
着本地設計師作品
雖則已有強勁陣容，但為JA波更有聲有色，八方聽聞仲有個特別節目，就係情商葉劉行天橋時裝表演。葉劉衣着打扮向來有非一般品味，fashionsense別具一格，當年掃把頭、豹紋衫獨步官場、飲譽香港，今次重出江湖值得期待，可惜佢話今次客隨主便，記協話事，佢會着本地設計師作品catwalk，家仲未揀衫。
葉劉笑言處女做model幾緊張，所以搵埋匯賢另一話事人史泰祖醫生一齊上台。葉劉出騷籌錢令人寄予厚望，因為金融海嘯令賣枱籌款有難度，有關方面十分審慎，今年JA波亦由幫襯多年嘅洲際酒店移師TheMira，據講成本平啲，較易計掂條數。